შშმ პირთა საჭიროებები და მხარდამჭერი სერვისები – შეხვედრა ახალციხეში

შევედრა დებატების რეჟმში ჩატარდა. ადგილობრივებს თბილისის მერიის შეზღუდული შესაძლებლობის მქონე პირთა საკითხებზე მომუშავე საბჭოს აღმასრულებელი მდივანი გიგა სოფრომაძე ესაუბრა. მან შშმ პირებისთვის ინკლუზიური განათლების ხელშემწყობ გარემოს აუცილებლობაზე და თბილისის მერიის მიერ შემუშავებულ სერვისებზე ისაუბრა.

„მაგალითად: მათთვის, ვისთვისაც ტრანსპორტში სიმაღლეზე ასვლა პრობლემაა, ავტობუსების ნაწილი ადაპტირებულია. უსინათლოთათვის მნიშვნელოვანია, რომ აცხადებენ ადგილმდებარეობას, რათა იცოდნენ, სად არიან. ქალაქში უნდა იყოს, ასევე, ნიშნები, რომ ადამიანს მიმართულება უჩვენოს. ადაპტირებული ანუ შედარებით დაბალი უნდა იყოს ტროტუარები, კიდევ მარტივად მოწყობილი გაჩერებები და გადასასვლელები. ზოგი გაჩერება თბილისში ჩვენ შევწიეთ, რათა ადვილად მისადგომი ყოფილიყო“,–ამბობს სოფრომაძე.

ახალციხის მუნიციპალიტეტის მერის მოადგილე გურამ მელიქიძე შეხვედრაზე განაცხადა, რომ თვითმმართველობა მაქსიმალურად ცდილობს, ის შენობები, რომლებსაც სრული რეაბილიტაცია უტარდებათ, შშმ პირთათვის ადაპტირებული გახდეს.

„შეზღუდული შესაძებლობების მქონე პირებისათვის საზოგადოებაში ინტეგრაცია მუნიციპალიტეტისათის არის მნიშვნელოვანი პრიორიტეტი. ეს დაკავშირებულია ბევრ სირთულესთან. ბოლო წლების განმავლობაში ამ ადამიანებისთვის არანაირი სერვისი არ იყო. ჩვენ მჭიდროდ ვთანამშრომლობთ შშმ პირთა არასამთავრობო ორგანიზაციებთან და ერთობლივად ვცდილობთ გარკვეული საკითხების გადაწყვეტას“, – ამბობს მელიქიძე.

მრგვალი მაგიდა ევროკავშირის პროექტის – „თანაბარი შესაძლებლობები შეზღუდული შესაძლებლობების მქონე პირთათვის“ – ფარგლებში გაიმართა. პროექტს საქართველოს არბაითერ–სამარიტერ–ბუნდი, მის პარტნიორ ორგანიზაციებთან–განათლების განვითარების და დასაქმების ცენტრთან და მოძრაობა „ ხელმისაწვდომი გარემო ყველასთვის“ – თანამშრომლობით“ ახორციელებს.



[მარიამ ბარძიმაძე, ახალციხე]