ვალეში, ის კორპუსი ინგრევა, რომელიც ხუთი თვე წყლით იტბორებოდა

მესამე დღეა, რაც ვალეში, მაჭარაშვილის ქუჩაზე კორპუსის ნაწილი და მისი მიმდებარე ტერიტორია წყლით აღარ ივსება. როგორც ადგილობრივები და ახალციხის მუნიციპალიტეტის გამგეობის თანამშრომლები ამბობენ, პრობლემა ერთ–ერთი ადგილობრივის შიდა ქსელი იყო.

„წვეთი წყალი აღარ გამოდის. ისევ ჩვენი ხარჯით მოგვიხდა შეკეთება, თითო ოჯახს 300–300 ლარი დაგვიჯდა. ეგ კი გაკეთდა, მაგრამ ახლა კორპუსი გვენგრევა თავზე. თუ რამე არ უშველეს, შეიძლება ჩამოიშალოს, ძირი აღარ აქვს შენობას“, – ამბობს ადგილობრივი ილონა ბათმანაშვილი.

ახალციხის მუნიციპალიტეტის გამგებლის წარმომადგენლის ელიოზ ბარბლიშვილის თქმით, მუნიციპალიტეტის გამგეობა ინფორმირებულია იმის შესახებ, რომ აღნიშნული კორპუსი ავარიულია და შეკეთება სჭირდება: „ინფრასტრუქტურის სამსახურის წარმომადგენლები იყვნენ უკვე მისული და ვითარებას სწავლობენ“.

რაც შეეხება წყლის ქსელის დაზიანების მიზეზს, მისი თქმით, როგორც ამას ვარაუდობდნენ, ადგილობრივების მიერ ახალი მილების ძველზე დაერთება იყო: „ძალიან ბევრი ვიწვალეთ, ვიდრე დაზიანების ადგილს ვნახავდით. შევაკეთეთ, ამისთვის ფინანსური ხარჯი არ გაგვიწევია“.
შეგახსენებთ, ხუთი თვის განმავლობაში, ვალეში, მაჭარაშვილის ხუთ ნომერში მდებარე კორპუსის ნაწილი და მიმდებარე ტეიროტია წყლით იტბორებოდა.



[თამუნა უჩიძე, ახალციხე]