ხუთი თვეა ვალეში კორპუსი წყლით იტბორება

ვალეში, მაჭარაშვილის ქუჩაზე, N5-ში მდებარე ორსართულიანი კორპუსი ყოველ დილით იტბორება. შენობის მარჯვენა კუთხეში ჩამოშლილი კედლის ნაწილიდან წყალი ჟონავს და როგორც კორპუსის შიდა, ასევე მიმდებარე ტერიტორიას, წყლით ფარავს. რა მოიშალა კორპუსში მაცხოვრებლებმა არ იციან, თუმცა ამბობენ, რომ შენობიდან წყალმა დინება ხუთი თვის წინ დაიწყო.

„ვერ გაივლი იმხელა წყალი დგას, შენობა ისეც დანგრეული იყო და ახლა უფრო მეტად ავარიულია, კორპუსის შიგნიდან საძირკველი ჩანს უკვე. ღამე დაძინების გვეშინია“, – ამბობს აღნიშნულ კორპუსში მცხოვრები სვეტა კოტოიანი.

ადგილობრივების თქმით, მათ საკუთარი ხარჯებით წყლის სისტემა შეცვალეს, თუმცა კორპუსთან წყალმა დინება მაინც არ შეწყვიტა.

„ივლისის შუა რიცხვებში გამოვცვალეთ მილები, თითო ოჯახს 200 ლარი დაგვიჯდა. საშუალებაც აღარ გვაქვს, კიდევ რაიმე რომ გავაკეთოთ“, – აცხადებს ადგილობრივი გაიანე აივაზიანი.

მაჭარაშვილის ქუჩაზე მცხოვრებლებმა, იმ დღესვე, როცა კორპუსი პირველად დაიტბორა, ახალციხის მუნიციპალიტეტის გამგეობას წერილობით მიმართეს. ამბობენ, რომ ახალციხის მუნიციპალიტეტის გამგებელი ზაზა მელიქიძე ადგილზე იმ დღესვე მივიდა.

„მოვიდა ნახა, დაგვპირდა გაგიკეთებთო. იმის მერე ზუსტად ხუთი თვე გავიდა, "წყალკანალის" ხალხის მოვიდა, გამგებლის წარმომადგენელი ბარბლიშვილიც, მაგრამ მას შემდეგ ერთმანეთს აბრალებენ და არაფერს აკეთებენ. სახლი რომ თავზე დაგვენგრეს, რომელი აიღებს პასუხისმგებლობას?!“ – კითხულობენ მაჭარაშვილის ქუჩაზე მცხოვრებლები.

ვითარების შესახებ ინფორმირებულია ვალეში გამგებლის წარმომადგენელი ელიოზ ბარბლიშვილი. ამბობს, რომ აქ ამ ხნის განმავლობაში დაზიანების წერტილს "წყალკანალი" ეძებდა: „ცოტახანი შევწყვიტეთ კიდეც წყლის მიწოდება, რომ გაეგოთ სად იყო დაზიანება. ყველა მხრიდან შეამოწმეს კომუნიკაცია და დაზიანება ვერ ნახეს. ახლაც იქ არიან და არ ვიცი რომელ მილს გადაკეტავენ დროებით, რომ ნახონ სად არის დაზიანება“.

შეკითხვაზე, ამ ყველაფერს ხუთი თვე რატომ დასჭირდა, ბარბლიშვილი გვპასუხობს: „ამ პროცედურებს წყალკანალის მხრიდან დღეები და რამდენიმე კვირაც კი დასჭირდა“.

გაერთიანებული წყალმომარაგების კომპანიაში ამბობენ, რომ ის ტერიტორია სადაც დაზიანების აღმოფხვრა მათი კომპეტენციაა, დიდი ხნის წინ შემოწმდა და გაირკვა, რომ პრობლემა შიდა ქსელია: „ეს კი ჩვენი კომპეტენცია არაა“.

ახალციხის ადგილობრივ თვიმმართველობაში კი ამბობენ, რომ თუ პრობლემა შიდა ქსელია, ამის მოგვარებას მობინადრეებთან ერთად ეცდებიან. მუნიციპალიტეტის გამგეობაში აცხადებენ, რომ მათი წარმომადგენლები ამ წუთშიც ადგილზე არიან გასულები და პრობლემას სწავლობენ.

[თამუნა უჩიძე, ახალციხე]