ახალციხის სოფლებში კორპუსების სახურავებს გამოცვლიან

ახალციხის მუნიციპალიტეტის გამგეობაში განმარტავენ, რომ 2016 წელს ვალეში, "მეორე შახტის" დასახლებაში სახურავს 5 საცხოვრებელ კორპუსს გამოუცვლიან. მრავალბინიანი კორპუსების სახურავები შეიცვლება სოფლებში: წნისსა და ზიკილიაშიც.

"მეორე შახტაში" ხუთი კორპუსის გადახურვისთვის ჯამში 62.244 ლარია გათვალიწინებული. აღნიშნული თანხიდან 17.000 ლარი „სოფლის მხარდაჭერის პროგრამიდან“ გამოიყო.

სოფელ წნისში ორი კორპუსი გადაიხურება, ოთხი და რვაბინიანი. ამისთვის 30.000 ლარი დაიხარჯება. რაც შეეხება ზიკილიას, აქ 21.012 ლარით ერთი კორპუსი გადაიხურება.

კორპუსების გადახურვისთვის საპროექტო სამუშაოები უკვე დასრულებულია.

ახალციხის მუნიციპალიტეტის გამგეობის ინფრასტრუქტურის სამსახურის უფროსის ნოდარ ბალახაშვილის განმარტებით, ტენდერი დაახლოებით ერთ კვირაში გამოცხადდება.

მისი თქმით, ასევე იგეგმება ახალშენში მდებარე კორპუსების სახურავის შეცვლაც, თუმცა როდის, ჯერ გადაწყვეტილი არ არის: "აქ ორი კორპუსია, საპროექტო სამუშაოები მიმდინარეობს, თუმცა მიმდინარე წელს ორივე კორპუსის გადახურას შევძლებთ თუ ერთის, ჯერ გადაწყვეტილი არ არის“.

შეგახსენებთ, რომ ვალეში, ე.წ. მეორე შახტის დასახლებაში ადგილბრივებმა მწყობრიდან გამოსული წყლის, ასევე ავარიული კორპუსების შეკეთებისა და უწყლობის გამო საპროტესტო აქცია არაერთხელ გამართეს. გასულ წელს აქ ხუთი ბინა გადაიხურა.

გამგებლის ზაზა მელიქიძის განმარტებით, მეორე შახტაში კიდევ რჩება მრავალბინიანი კორპუსები გადასახური და შესაძლოა წლის ბოლომდე კიდევ რამდნიმეს გადახურვა შეძლონ.

[თინათინ ზაზაძე, ახალციხე]