ივერიელის კორპუსი დანგრევის პირასაა

30 წელიწადზე მეტია ივერიელის ქუჩაზე, შემაღლებულ ადგილზე ოთხსართულიანი კორპუსი დგას. ქალაქში ამ კორპუსს, მისი ადგილმდებარეობის გამო, ხშირად ცალკე კუნძულად მოხსენიებენ.

კორპუსის მცხოვრებლები ამბობენ, რომ არაერთხელ აღმოჩნდნენ სხვადასხვა პრობლემის წინაშე.

ამჟამად მოსახლეობას ყველაზე მეტად შენობის პრობლემა აწუხებს. კორპუსის მცხოვრებლები ამბობენ, რომ შენობა დანგრევის პირასაა.
„ბინა ფაქტობრივად იშლება, უკვე ”არმატურები” ჩანს“, –გვეუბნება კორპუსის მცხოვრები ლალი ტონაკანიანი.

ადგილობრივები გვიხსნიან, რომ ათეული წლებია შენობას რეკონსტრუქცია არ ჩასტარებია. ამას ხანგრძლივი წვიმებიც დაემატა, კედლები დასველდა და დაიბზარა. მათივე თქმით, წყალი კედლებიდან სახლებშიც შევიდა, დაზიანებულია სადარბაზოებიც. ჭერიდან ბათქაში ცვივა.
კორპუსის „ამხანაგობის“ თავმჯდომარე ნოდარ მაისურაძე ამბობს, რომ ოფიციალური განცხადებით კორპუსის მცხოვრებლებს არავისთვის მიუმართავთ.

"უბრალოდ, დიდი სურვილი გვაქვს, ფასადი შეკეთდეს", - ამბობს იგი.

მიუხედავად იმისა, რომ შენობის მდგომარეობა ყველა მცხოვრებს აწუხებს, კომპეტენტური უწყებისთვის მიმართვას არავინ აპირებს.
"წერე და იკითხე... რა აზრი აქვს, შედეგი მაინც არ მოჰყვება", - გვეუბნება ლალი ტონაკანიანი.

შენობის პრობლემებზე კორპუსის მცხოვრებლები წინასაარჩევნოდ მათთან მისულ ”ერთიანი ნაციონალური მოძრაობის” მაჟორიტარ კანდიდატს (აწ უკვე დეპუტატს) ვაჟა ჩიტაშვილს ესაუბრნენ. ჩიტაშვილი ადგილობრივებს ფასადის შეკეთებას დაჰპირდა.

”დაგვპირდა, რომ ბუნებრივ აირს შემოგვიყვანდნენ და ფასადსაც შეგვიკეთებდნენ. ბუნებრივი აირი მართლაც შემოგვიყვანეს, თუმცა, ფასადთან დაკავშირებით არავინ ჩანს“, - ამბობს ლალი ტონაკანიანი.

ვაჟა ჩიტაშვილმა ”სამხრეთის კარიბჭესთან” საუბარში დაადასტურა, რომ ადგილობრივებს კორპუსის პრობლემებია მოგვარებას ნამდვილად დაჰპირდა. თუმცა, როდის დაიწყება კორპუსის შეკეთება, მისთვის ჯერჯერობით უცნობია
.
არსებულ პრობლემაზე „სამხრეთის კარიბჭე“ მუნიციპალიტეტის გამგებელს გელა დემეტრაძესაც დაუკავშირდა. დემეტრაძემ თავდაპირველად შეხვედრაზე უარი მოუცლელობის გამო თქვა, მეორე დღიდან კი ჩვენს ზარებს აღარ უპასუხა.

[ნინო ზედგინიძე, ახალციხე]