ვალეში საცხოვრებელი კორპუსი ისევ წყლით იტბორება

მას შემდეგ რაც „გაერთიანებული წყალმომარაგების კომპანიამ“ ვალეში, მაჭარაშვილის ქუჩაზე არსებული ვითარება შეისწავლა და დაასკვნა, რომ აქ არსებული პრობლემა მათი კომპეტენცია არაა დაზიანების ადგილის პოვნას ახალციხის მუნიციპალიტეტის გამგეობის წარმომადგენლები ცდილობენ.

„ათი დღეა გამგეობას მუშები მოყავს და ეძებენ, მაგრამ ვერ პოულობენ რა არის დაზიანებული. ჯერ ჩემ მეზობელს, გაიანე აივაზიანს დააბრალეს, შენი ქსელის ბრალიაო, მერე იმან შეცვალა და მაინც იტბორება. ვერ გავიგეთ რა ხდება“, – ამბობს ადგილობრივი ილონა ბათმანაშვილი.

ახალციხის მუნიციპალიტეტის გამგეობაში ამბობენ, რომ დაზიანებული ნამდვილად შიდა ქსელია და მის აღმოფხვრას ამ დრომდე ცდილობენ.
„ადგილობრივებმა მილები რომ შეცვალეს, ის ძველ დამპალ ქსელს მიაერთეს და მიზეზი ეს აღმოჩნდა, იმ ძველი მილებიდან ჟონავს წყალი. ამ დაზიანებას მოსახლეობა თვითონ ვერ მიაგნებდა. მუშაოებენ ამ დრომდე და მალე მოგვარდება ყველაფერი“, – ამბობს ვალეში გამგებლის წარმომადგენელი ელიოზ ბარბლიშვილი.

შეგახსენებთ, რომ ვალეში მაჭარაშვილის ქუჩაზე მდებარე კორპუსი ხუთი თვეა წყლით იტბორება. აქ ჯერ გაერთაინებული წყალმომარაგების კომპანია ცდილობდა დაზიანებული ადგილის პოვნას, ახლა კი პრობლემის აღმოფხვრას გამგეობის წარმომადგენლები ცდილობენ.



[თამუნა უჩიძე, ახალციხე]