ახალციხის საოლქო კომისია ეთნიკურ უმცირესობებს კენჭისყრის დღის პროცედურებს აცნობს

#27-ე სოფელ წყრუთის საარჩევნო უბანზე, ახალციხის საოლქო კომისიის თავმჯდომარემ და წევრებმა იმიტირებული არჩევნები ჩაატარეს, რომელშიც მონაწილეობა წყრუთის საუბნო კომისიის წევრებმა და ადგილობრივებმა მიიღეს.

„ეს შეხვედრები, ეთნიკური უმცირესობებისათვის, კენჭისყრის დღის პროცედურების გაცნობას ისახავს მიზნად. იმისათვის, რომ მიიღონ არჩევნებში მონაწილეობა და გაიგონ რისი უფლება აქვთ უბანზე“, -განაცხადა, #37-ე ახალციხის საოლქო კომისიის თავმჯდომარემ თეა გავაშელმა.

მისივე თქმით, არჩევნების დღემდე საოლქო კომისიის წევრები, ახალციხეში კიდევ 7 საარჩევნო უბანს შემოივლიან და ეთნიკურ უმცირესობებს არჩევნებთან დაკავშირებით, თავიანთ უფლებებს გააცნობენ. ასევე ხმის მიცემის პროცედურებთან დაკავშირებით იმიტირებულ არჩევნებს ჩაატარებენ.

იმიტირებული არჩევნების გარდა, დღეს #27-ე წყრუთისსაარჩევნო უბანზე, საუბნო კომისიის თავმჯდომარის მოადგილეც აირჩიეს.
როგორც გაირკვა, პირველად არჩეული მოადგილე ერთერთი პარტიის წარმომადგენელი იყო, რომელიც პარტიამ შეცვალა და ახალი მოადგილის არჩევა გადა საჭირო.

„არჩევნების დღემდე, ნებისმიერ პარტიას უფლება აქვს თავისი წარმომადგენელი შეცვალოს საუბნო კომისიაში, მსგავსი შემთხვევები კი ხშირად ხდება“, -გვითხრა, თეა გავაშელმა.

[ლუბა გიორგაძე, ახალციხე]