ახალციხის ოლქში საუბნო კომისია დასაკომპლექტებელი 1 უბანზე დარჩა

N37-ე ახალციხის საოლქო საარჩევნო კომისიის თავმჯდომარის თეა გავაშელის თქმით, N15 ელიაწმინდის საარჩევნო უბანზე კომისიის წევრობაზე კონკურსი თავიდან გამოცხადდება.

„იმის გამო, რომ აღნიშნულ უბანზე კომისიის წევრობაზე განაცხადი არ შემოვიდა, უბანზე 12–კაციანი კომისია გვყავს“, – ამბობს გავაშელი.

რაც შეეხება დანარჩენ 8 საარჩევნო უბანს, სადაც წევრები პოლიტიკურ პარტიებს არ ჰყავდათ, გავაშელის თქმით, პარტიებმა წევრები შეცვალეს და ამ ეტაპზე კვალიფიციურ საარჩევნო სუბიექტებს წევრი ყველა საუბნო კომისიაში ჰყავთ.

შეგახსენებთ, რომ N37-ე ახალციხის საარჩევნო ოლქში 35 საარჩევნო უბანი იქნება. 13 უბანი ქალაქ ახალციხეში გაიხსნება, 4 ვალეში, დანარჩენი კი მუნიციპალიტეტის სოფლებში.

[მანანა სარაშვილი, ახალციხე]