15:00 საათის მონაცემებით, ახალციხეში არჩევნებში მონაწილეობა 35,14%-მა მიიღო

15:00 საათამდე #37 ახალციხის საარჩევნო ოლქში ოთხი საჩივარია შესული. საოლქო კომისიის თავმჯდომარის თეა გავაშელის თქმით, არჩევნები მშვიდ გარემოში მიმდინარეობს, თუმცა გარკვეული დარღვევები რამდენიმე უბანში მაინც დაფიქსირდა.

„მე-4, მე-5, 31-ე და 21-ე უბნებზე ერთადიგივე სახის დარღვევები დაფიქსირდა. პოლიტიკურ სუბიექტებს უბნებზე რამდენიმე წარმომადგენელი ჰყავდათ“, - ამბობს თეა გავაშელი.

მისივე თქმით, ორი დარღვევა იყო პირველ უბანზე. ერთ ამომრჩეველს საკუთარი სახელისა და გვარის გასწვრივ ხელმოწერა დახვდა.ეს პრობლემა აღმოიფხვრა იმით, რომ კომისიის წევრებმა მოხსნეს რეგისტრატორი. "აღნიშნულ უბანზე საჩივარი დაიწერა, დანარჩენზე კი კომისია იმსჯელებს", - ამბობს გავაშელი.

რაც შეეხება მეორე დარღვევას, ამავე უბანზე ერთი ამომრჩეველი, რომელსაც მარკირება უკვე გაკეთებული ჰქონდა, ხელმეორედ ცდილობდა ხმის მიცემას.გავაშელის თქმით, ნაკადის მარეგულირებელმა აღნიშნული პიროვნება უბანზე არ დაუშვა.

დარღვევაზე შეტყობინება საოლქო კომისიაში #35 აწყურის საარჩევნო უბნიდანაც შევიდა.

„ბურჯანაძის წარმომადგენლები ამბობდნენ, რომ მათ უბანზე კომისიის თავმჯდომარე არ უშვებდა. ფაქტი მაშინვე გადავამოწმეთ, უბნის თავმჯდომარემ გვითხრა, რომ უბანზე მხოლოდ პარტიის და სუბიექტის ერთ წარმომადგენელს დაუშვებენ“, - ამბობს გავაშელი.

[Sknews.ge]