ყოფილი პოლიტპატიმარი სამცხე-ჯავახეთის სამმართველოს უხელმძღვანელებს

დღეიდან სამცხე-ჯავახეთის სამხარეო მთავარ სამმართველოს ბაკურიანში ბიძინა ივანიშვილის რეზიდენციის დაცვის ყოფილი უფროსი რევაზ მუმლაძე უხელმძღვანელებს. ამის შესახებ მუმლაძემ ”სამხრეთის კარიბჭეს” სატელეფონო საუბარში დაუდასტურა.

მუმლაძემ ვახტანგ ტალახაძე ჩაანაცვლა. ტალახაძემ გადადგომის შესახებ განცხადება უკვე დაწერა. მას აღნიშნული პოსტი დაახლოებით სამი თვის განმავლობაში ეკავა.

მუმლაძემ ციხე 190 პოლიტპატიმართან ერთად დატოვა. იგი 2012 წლის 14 თებერვალს დააკავეს და 3-წლიანი პატიმრობა მიუსაჯეს, მას ბაკურიანში მიწის ნაკვეთის არასწორად შესყიდვას ედავებოდნენ. მუმლაძე აცხადებს, რომ მან ნაკვეთი კანონის სრული დაცვით შეიძინა და მისი დაკავება პოლიტიკური გადაწყვეტილება იყო, რაც უშუალოდ 2012 წლის საპარლამენტო არჩევნებს უკავშირდებოდა.

”ჩემი მოშორება იმიტომ უნდოდათ, რომ წლების განმავლობაში ვმუშაობდი ძალოვან სტრუქტურაში, უშიშროებაში, ასევე სამმართველოში ახალიცხეში, ადიგენშიც. ბევრი მეგობარი მყავდა და რეგიონში ხელი თითქმის ყველაგნ მიმიწვდებოდა. მათ იცოდნენ, რომ საქართველოს უკეთესი მომავლისთვის ბოლომდე ვირძოლებდი და ამიტომ, თავიდან მომიშორეს”, - ამბობს პატიმრობიდან გათავისულფებული მუმლაძე.

[თამუნა უჩიძე, ახალციხე]