პრემიერი დღეს რეგიონების გუბერნატორებს წარადგენს

შეგახსენებთ, საქართველოს პრეზიდენტის რწმუნებულებმა-გუბერნატორებმა, გადადგომის შესახებ განცხადებები საპრეზიდენტო არჩევნების მეორე დღეს, 28 ოქტომბერს დაწერეს. პოსტი დატოვა სამცხე-ჯავახეთის გუბერნატორმა ივანე წიკლაურმაც.

ორი თვეა სამცხე-ჯავახეთში რწმუნებულის პოსტზე ადგილობრივები სხვადასხვა კანდიდატურებს მოიაზრებენ.

უკვე დასახელებულ ექვს კანდიდატს: შსს მცხეთა-მთიანეთის სამხარეო სამმართველოს უფროსი გია მეტრეველი, შსს სამცხე-ჯავახეთის სამხარეო-მთავარი სამმართველოს ყოფილი უფროსი რევაზ მუმლაძე, „ქართული ოცნების“ რეგიონული კოორდინატორი სამცხე-ჯავახეთში გია კარკაძე, „ქართული ოცნების“ ახალციხის შტაბის უფროსი, ახალციხის მუნიციპალიტეტის გამგებლის მოადგილე მალხაზ ჟუჟუნაძე, სამცხე-ჯავახეთის ყოფილი გუბერნატორი, "ქართული ოცნების" ცენტრალური შტაბის აქტივის წევრი გელა კვარაცხელია და ბათუმის ფარმაცევტული ქარხნის შპს "ბიოპოლუსის" 90% წილის მფლობელი, ბიზნესმენი გელა ობოლაშვილი, დღეს, 13 დეკემბერს, კიდევ ერთი კანდიდატი, ადიგენის მაჟორიტარობის კანდიდატი კოალიცია "ქართული ოცნებიდან", საპარლამენტო უმრავლესობის წევრი ბიძინა გუჯაბიძე შეემატა.

შეგახსენებთ, ყველა კანდიდატი "სამხრეთის კარიბჭესთან" საუბარში ამბობს, რომ ოფიციალური შეთავაზება არ მიუღიათ. იგივე განაცხადა ბიძინა გუჯაბიძემაც.

"ეს ინფორმაცია არ ვიცი საიდან მიიღეთ თქვენ, მაგრამ, არ დასტურდება. ჩემთვის ეს პოსტი არავის შემოუთავაზებია", - განუცხადა ბიძინა გუჯაბიძემ "სამხრეთის კარიბჭეს".

შეგახსენებთ, სამცხე-ჯავახეთში სახელმწიფო-რწმუნებულმა, გუბერნატორმა ივანე წიკლაურმა გადადგომის შესახებ განცხადება საპრეზიდენტო არჩევნებიდან მეორე დღეს, 28 ოქტომბერს დაწერა. მისი განცხადება 15 ნოემბერს დაკმაყოფილდა. ამ დრომდე რწმუნებულის მოვალეობას ყოფილი რწმუნებულის პირველი მოადგილე ჰარუთიუნ ჰოვჰანესიანი ასრულებს.

[ნინო ნარიმანიშვილი, ახალციხე]