”ახალგაზრდობა სამართლიანი არჩევნებისთვის” ახალგაზრდებს შეხვდა

შეხვედრა ახალციხის ”დემოკრატიული ჩართულობის ცენტრში” შედგა და მას ოცამდე ახალგაზრდა დაესწრო.

ორგანიზაცია, რომელშიც 13 პარტიის ახალგაზრდული ფრთის წარმომადგენლები არიან გაერთიანებული, საერთაშორისო რესპუბლიკური ინსტიტუტის (IRI) მხარდაჭერითა და USAID-ის დაფინანსებით ფუნქციონირებს.

ორგანიზაციის მიზანია გაზარდოს ახალგაზრდების მონაწილეობა არჩევნებში.

დღევანდელ შეხვედრაზე ადგილობრივ ახალგაზრდებს სამი პარტიის: ”ნაციონალური მოძრაობის”, ”ეროვნული ფორუმისა” და ”რესპუბლიკური პარტიის” წარმომადგენლები შეხვდნენ.

ახალგაზრდებმა ოქტომბერში დანიშნულ არჩევნებზე, საპარლამენტო და საპრეზიდენტო რესპუბლიკაზე და ადგილობრივ თვითმმართველობაზე ისაუბრეს.

- ”რეგიონებში გზების დაგება და გაზის შეყვანა არ უნდა იყოს ცენტრალური ხელისუფლების პიარის საშუალება. ადგილობრივი თვითმმართველობა არ არსებობს, ყველაფერს ცენტრალური ხელისუფლება წყვეტს”, - განაცხადა ”რესპუბლიკური პარტიის” ახალგაზრდული ფრთის წარმომადგენელმა ლაშა მესხმა.

”ეროვნული ფორუმის” წარმომადგენელი შორენა ხორბალაძე ახალგაზრდებს სამოქალაქო საზოგადოების რაობის შესახებ ესაუბრა.

შეხვედრას ვერ დაესწვრნენ ”ნაციონალური მოძრაობის” ახალგაზრდული ფრთის წარმომადგენლები, რომლებსაც ახალციხის ციხის ტერიტორიაზე ”ბოლივუდის” ფილმში იღებენ.

შეხვედრაზე უმრავლესობას ”ქართული ოცნების” აქტივისტები წარმოადგენდნენ.
”ახალგაზრდობა სამართლიანი არჩევნებისთვის” შეხვედრას მთელი საქართველოს მასშტაბით მართავს. შემდეგი შეხვედრა მარნეულსა და ზუგდიდში გაიმართება.

[თინათინ ზაზაძე, ახალციხე]