პოლიტიკური პარტიების მიერ დაფიქსირებული დარღვევები ახალციხეში

„ნინო ბურჯანაძე – ერთიანი ოპოზიციის“ გამგებლობის კანდიდატი ოლეგ ძოწენიძე ამბობს, რომ „ქართული ოცნების“ აქტივისტები თითქმის ყველა უბანზე დგანან და აგიტაციას ეწევიან: „ამომრჩევლებს ეუბნებიან, რომ 41 შემოხაზონ“.

„სალომე ზურაბიშვილი – საქართველოს გზის“ მერობის კანდიდატი გოჩა ათოშვილი ამბობს, რომ პარტიის წარმომადგენლებს საარჩევნო უბნებზე სერიოზული დარღვევები არ დაუფიქსირებიათ: „უმნიშვნელო დარღვევები იყო, თუმცა ჩვენმა წარმომადგენლებმა საჩივრები მაინც დაწერეს. მაგალითად, N5 ახალციხის უბანზე კომისიის წევრმა ამომრჩეველს შემოხაზული ბიულეტენი წაართვა, ვითომ აინტერესებდა სწორედ ჰქონდა თუ არა შევსებული“.

„ერთიანი ნაციონალური მოძრაობის“ შტაბში აცხადებენ, რომ არჩევნები მცირე ექსცესებით მიმდინარეობს. „ნაციონალებმა“ რამდენიმე უბანზე საჩივრებიც დაწერეს.

„N12 აგარისა და N23 ფერსის უბნებზე არ მოგვცეს ვიდეოს ხანგრძლივად გადაღების უფლება. ასევე, ამავე უბნებზე ჩვენი წარმომადგენლები არ ჩაანაცვლეს. N2 უბანზე ამომრჩეველმა სხვის მაგივრად მისცა ხმა. ამავე უბანზე კაბინაში აღმოაჩინეს ფურცელი, რომელზეც ეწერა 41“ ,– განაცხადეს „ერთიანი ნაციონალური მოძრაობის“ შტაბში.

„საქართველოს პატრიოტთა ალიანსის“ წარმომადგენლის თამარ სამსონიძის თქმით, საარჩევნო უბნებთან უშიშროების წარმომადგენლები დგანან.

„ჩაბურული ავტომანქანებით მოძრაობენ პირები, რომლებიც, ჩვენი ვარაუდით, უშიშროების წარმომადგენლები არიან. თითქმის 10 საარჩევნო უბანზე ვიყავი, ერთ–ერთ უბანზე, ქალაქ ვალეში, კარებთან ზის ოცნების წარმომადგენელი და ამომრჩევლებს მოუწოდებს, რომ შემოხაზონ 41“,– განაცხადა სამსონიძემ.

„ქართული ოცნების“ შტაბში აცხადებენ, რომ მათ წარმომადგენლებს უბნებზე დარღვევები არ დაუფიქსირებიათ. მათი შეფასებით, არჩევნები მშვიდ გარემოში მიმდინარეობს.

[sknews.ge]