ახალციხეში ნარჩენებს ჩიხებსა და მდინარის ნაპირებზე ყრიან [Photo]

მიქუტიშვილის ქუჩის გასწვრივ, მდინარე ფოცხოვის სანაპიროზე საყოფაცხოვრებო ნარჩენები ყრია.

„ჩვენთან ურნები დგას, ვიდრე დადგამდნენ, ნაგვის მანქანაა მოდიოდა ხოლმე და იქ ვცლიდით დაგროვილ ნარჩენებს. ყველა ურნაშია არ ყრის, მიაქვთ და მდინარის ნაპირზე აგდებენ. მაგიტომაა მანდ სულ ნაგავი“, – ამბობს მიქუტიშვილის N22–ში მცხოვრები დარეჯან გვირჯიშვილი.





დანაგვიანებულია მესხეთის სტადიონის გასწვრივ თამარ მეფის ქუჩაც, რომელიც ასპინძისა და რუსთაველის ქუჩებს ერთმაენთთან აკავშირებს. აქ როგორც სამშენებლო, ასევე, საყოფაცხოვრეო ნარჩენები ყრია.





ნაგავსაყრელადაა ქცეული სერაპიონ ზარზმელის ქუჩაზე ფერდობიც. აქ საყოფაცხოვრებო ნარჩენებთან ერთად ნაკელიც ყრია. აქ მცხოვრებლებს საქონელი ჰყავთ და სადგომების დასუფთავების შემდეგ ნარჩენები აქ გამოაქვთ.

ზარზმელის ქუჩაზე მცხოვრები ნატალია ვლასოვა, რომელიც ამავე ქუჩაზე წლების განმავლობაში მეეზოვედ მუშაობდა ამბობს, რომ ხალხი ნარჩენების ურნებში ჩაყრას მიჩვეული არაა: „ამ ქუჩის დაღმართზე ერთ ჩავლაზე ორ „მეშოკ“ ნაგავს ვკრეფდი ხოლმე“.



ახალციხის მუნიციპალიტეტის მერიის ზედამხედველობის სამსახურს ამ დრომდე აღნიშნულ ქუჩებზე არავინ დაუჯარიმებია: „უკანონო ნაგავსაყრელებთან დავაშირებით მუნიციპალიტეტი საქმის კურსშია, შესაბამისი სამსახურები მუშაობენ აღნიშნული კუთხით და ეტაპობრივად აღმოიფხვრება ეს პრობლემა“, – გვითხრეს ახალციხის მუნიციპალიტეტის მერიის საზოგადოებასთან ურთიერთობის სამსახურში.

[თორნიკე ზაზაძე, ახალციხე]