ახალციხის მერიის ზედამხედველობის სამსახური განცხადებას ავრცელებს

ახალციხის მუნიციპალიტეტის მერიის ზედამხედველობის სამსახურის უფროსმა მედიასთან განცხადება დღეს, 4 ივნისს გააკეთა. მისი თქმით, ქალაქში უსახური მშენებლობის, სამშენებლო მასალების დაყრის, მიწის თვითნებურად გადათხრის, წყლისა და საკანალიზაციო სისტემების შეცვლის შემთხვევაში ზედამხედველობის სამსახური მოქალაქეებს დააჯარიმებს.

"მსგავს შემთხვევებში ჩვენი სამსახური სადამსჯელო ღონისძიებებს ატარებს. ამიტომ, მოსახლეობამ უნდა იცოდეს, თუნდაც ერთი ფანჯარა რომ ამოიღოს და ფასადი შეუცვალოს თავის შენობა–ნაგებობას, ეს იქნება კომერციული თუ საცხოვრებლი ფართი, ამაზეც ჯარიმდება თუ ინფრასტრუქტურის სამსახურიდან შესაბამისი ნებართვა არ ექნება“, – ამბობს მერიის ზედამხედველობის სამსახურის უფროსი ნაირა სამსაონიძე.

მისივე თქმით, უკანონო მშენებლობის დროს ზედამხედველობის სამსახურის წარმომადგენელი შეისწავლის რა მასშტაბის სამართალდარღვევაა, ამის შემდეგ გადაწყდება მოსახლე მხოლოდ გაფრთხილებას მიიღებს თუ შესაბამისი ოქმი შედგება.

ზედამხედველობის სამსახური მოსახლეობას ასევე მოუწოდებს, რომ ნაგვის ურნებში სამშენებლო მასალების ნარჩენები და პირუტყვის ფეკალიები არ ჩაყაროს.

„ნაგვის მანქანა ვერ ერევა სამშენებლო მასალების ნარჩენებს და ფუჭდება. ჩვენი თხოვნაა მოსახლეობამ ესეც გაითვალისწინოს და აღნიშნული ნარჩენები თავად გაიტანოს ნაგავსაყრელზე“, – ამბობს ნაირა სამსონიძე.

შეგახსენებთ, რომ ახალციხის მუნიციპალიტეტის მერიაში ზედამხედველობის სამსახური მიმდინარე წლის მაისში შეიქმნა. სამსახურის უფროსის გარდა აქ ორი უფროსი სპეციალისტი მუშაობს.

[თინათინ ზაზაძე, ახალციხე]