კომპენსაცია ფართის ნაცვლად – მაზმიშვილის საქმე, ახალი დეტალები

მოქალაქე ელგუჯა მაზმიშვილისათვის ალტერნატიული ფართის გადაცემის საქმეზე, 21 სექტემბერს ახალციხის რაიონულ სასამართლოში სხდომა ისევ გადაიდო.

ამჯერადაც სხდომის გადადების მიზეზი, შინაგან საქმეთა სამინისტროსა და ეკონომიკის სამინისტროებს შორის მორიგება გახდა.
როგორც ადვოკატი ნუგზარ სამარჯიშვილი ამბობს, შესაძლოა ელგუჯა მაზმიშვილს ალტერნატიული ფართის ნაცვლად, შინაგან საქმეთა სამინისტრომ კომპენსაცია გადსცეს.

„ტბის ტერიტორიაზე, ის ფართი,რომელიც მაზმიშვილისთვის უნდა მიეცათ, მერიის ბალანსზე არ ყოფილა, ამიტომ ახლა თანხაზე რიგდებიან“, -გვითხრა სამარჯიშვილმა.

კომპენსაციას მიიღებს თუ ალტერნატიულ ფართს მაზმიშვილ 12 ოქტომბერს შეიტყობს, როდესაც შსს და ეკონომიკის სამინისტრო საბოლოოდ მორიგდებიან და მოსამართლე გადაწყვეტილებას გამოაცხადებს.

ელგუჯა მაზმიშვილი ოთხ უწყებას: ეკონომიკის სამინისტროს, საჯაროო რეესტრს, შსს-სა და ეკონომიკის სამინისტროს სსიპ სამცხე-ჯავახეთის მომსახურების ცენტრს ედავება. სარჩელის მიხედვით, მაზმიშვილი მათგან 2010 წელს შსს-ს მიერ, 19 კვადრატული მეტრი ფართის რეგისტრაციის გაუქმებასა და საკუთრებაში დაბრუნებას ითხოვს.

საქმე ეხება, ახალციხეში, საპატრულო პოლიციის მიმდებარე ტერიტორიას, სადც ახლა საბავშო ატრაქციონია განლაგებული. ელგუჯა მაზმიშვილი ამბობს, რომ ეს ტერიტორია მის საკუთრებაში იყო და ყოფილმა ხელისუფლებამ უკანონოდ ჩამოართვა.

[ლუბა გიორგაძე, ახალციხე]