საუბნო კომისიის თავმჯდომარე, მდივანი და მოადგილე N20–ე სვირის საარჩევნო უბანზე 8 სექტემბერს აირჩიეს. მდივნის პოზიციაზე ნათელა ბიბილური დასახელდა, რომელიც ამ კომისიაში „ერთიანი ნაციონალური მოძრაობის“ წარმომადგენელია. ბიბილური ამბობს, რომ მდივნობა არ სურდა, თუმცა, მაინც დათანხმდა.
„ერთხმად ამორჩიეს, უარი განვაცხადე, რადგან გამოცდილება არ მქონდა, მაგრამ დაგეხმარებითო ყველამ და მეც დავთანხმდი. შევავსეთ შესაბამისი ოქმიც“, – ამბობს იგი და ამატებს, რომ მალევე სოფელ სვირში „ქართული ოცნების“ საარჩევნო შტაბის ხელმღვანელი გიორგი გვარამაძე მივიდა და ბიბილურს პოზიციის დატოვება მოსთხოვა, – „მე თქვენ გიცნობთო, ამ დროს ვმუშაობდი, ჟურნალს ვავსებდი. მითხრა, არ გვაწყობს მდივანი „ნაციონალებიდან“ და უნდა დატოვო მდივნობა, პრობლემა შეგექმნება შენც და მეცო. მე ჩემი საქმე მაინც გავაკეთე, შედგენილი ოქმი კომისიის თავმჯდომარეს, ბუღუტი ღონღაძეს ჩავაბარე, რომ ახალციხის საოლქო კომისიაში წაეღო“.
ნათელა ბიბილურის მდივნად არჩევას ადასტურებს კომისიის წევრი ამავე უბანზე ნანა შუბითიძე (კონსერვატიული პარტია).
„მდივანი ერთხმად ავირჩიეთ, ნათელა ბიბილური. სხვა კანდიდატებიც იყვნენ, მაგრამ ყველა იყო უარზე და ბოლოს ნათელა დაგვთანხმდა“, – ამბობს ნანა შუბითიძე და ამატებს, რომ სხდომის დასრულების შემდეგ, ყველა შესაბამისი დოკუმენტი კომისიის თავმჯდომარეს, ბუღუტი ღონღაძეს გადასცეს, ახალციხის საოლქო საარჩევნო კომისიაში წარსადგენად.
ბუღუტი ღონღაძემ N44.37.20 საუბნო საარჩევნო კომისიის სხდომის ოქმი N1 ახალციხის საოლქო საარჩევნო კომისიას ნამდვილად წარუდგინა. თუმცა, ოქმში, მდივნის პოზიციაზე, ნათელა ბიბილურის ნაცვლად, ეკატერინე ხალაძე წერია.
ნათელა ბიბილური ამბობს, რომ როდის და რა ვითარებაში შეიცვალა მდივნის ვინაობა ოქმში, მისთვის უცნობია.
N20–ე სვირის საუბნო საარჩევნო კომისიის თავმჯდომარე ბუღუტი ღონღაძე ამტკიცებს, რომ ოქმი არ გაყალბებულა. ნათელა ბიბილურმა კომისიის მდივნობაზე საკუთარი ნებით თქვა უარი, იმ მიზეზით, რომ საქმე ერთულებოდა. ამის შემდეგ, მაშინვე კომისის სხდომა შედგა, რომელზეც ნათელა ბიბილურმა მდივნობაზე უარი თქვა და სხვა აირჩიეს.
შეკითხვაზე, არსებობს თუ არა ნათელა ბიბილურის უარის დამადასტურებელი რაიმე დოკუმენტი, კომისიის თავმჯდომარე გვპასუხობს: „არა, სიტყვიერად დაგვიდასტურა, ხელმოწერა არ არსებობს. უარი, რომ განაცხადა, გადავირჩიეთ. არ დავშლილვართ, ყველა იქ ვიყავით, ნათელა ეკატერინე ხალაძემ ჩაანაცვალა“.
სხდომის ხელმეორეთ ჩატარებაზე საუბრობს კომისიის წევრი ზაურ გოგოლაძეც (ოლქის მიერ დანიშნული წევრი). თუმცა, ბუღუტი ღონღაძისგან განსხვავებით, იგი ამბობს, რომ მდივნის ასარჩევად თავიდან შეიკრიბნენ: „წავედი სახლში, სტუმრები მომივიდნენ, მერე მეორეთ შევიკირიბეთ სხდომაზე და ავირჩიეთ სხვა“.
არც მაშინვე და არც ხელმეორედ შეკრებას არ ადასტურებენ ნათელა ბიბილური და ნანა შუბითიძე. მეტიც, ნათელა ბიბილური ამბობს, რომ ამ დრომდე მასთან ინახება საარჩევნო უბნის სეიფის გასაღები, რომელიც არჩევის შემდეგ ჩააბარეს. თუმცა, ოქმში, ეკატერინე ხალაძის არჩევის შესახებ, ნათელა ბიბილურიც და ნანა შუბითიძეც მომხრეების სიაში წერიან.
სვირის საარჩევნო უბანში მომხდარ ფაქტს, გუშინ, 9 სექტემბერს, „ერთიანი ნაციონალური მოძრაობა“ სპეციალური ბრიფინგით გამოეხმაურა. პარტიაში ამბობენ, რომ მომხდარი „ქართული ოცნების“ შტაბის ხელმძღვანლის ზეწოლის შედეგია, ოქმის გაყალბებაში კი პარტია საუბნო კომისიის თავმჯდომარეს ადანაშაულებს.
„სვირში მივიდნენ ახალციხის საოლქო კომისიის წარმომადგენლები, მათ თან ახლდა „ქართული ოცნების“ ახალციხის შტაბის ხელძღვანელი გიორგი გვარამაძე. გვარამაძემ ბიბილურს რამდენჯერმე მოუწოდა, რომ მდივნობაზე უარი ეთქვა, თუმცა ბიბილუარისგან უარი მიიღო. ასევე ეცადა სვირის საუბნო კომისიის თავმჯდომარეზე მოეხდინა ზეწოლა. საბოლოოდ თავმჯდომარე ჩამოიყვანა ახალციხის საოლქო კომისიაში, სადაც შედგა ახალი ოქმი და სვირში მდივნად დანიშნეს ვინმე ეკა ხალაძე“, – განაცხადა გელა დემეტრაძემ ბრიფინგზე.
„ქართული ოცნების“ ახალციხის შტაბის ხელმძღვანელის ჩარევას საქმიანობაში, კატეგრიულად უარყოფს ბუღუტი ღონღაძე. შეკითხვაზე, იყო თუ არა ნამდვილად სოფელ სვირის საარჩევნო უბანთან „ქართული ოცნების“ ახალციხის შტაბის ხელმძღვანელი გიორგი გვარამაძე, გვპასუხობს: „მესაუბრა რა, ჩემი მეგობრის შვილია და ვისაუბრეთ. გაიგო რა სიტუაცია იყო. იმ დროს უკვე ახალი მდივანი გვყავდა არჩეული“.
რა მოხდა N20–ე სვირის საარჩევნო უბანზე, გუშინ, მთელი დღის განმავლობაში ცდილობდა გარკვევას N37–ე ახალციხის საოლქო საარჩევნო კომისია. კომისიის თავმჯდომარემ თეა გავაშელმა სვირის საარჩევნო უბნის წევრები დაიბარა და ახსნა–განმარტებები დააწერინა.
„ვიცით, რომ რაღაც ფაქტი მოხდა, უკვე დაიწყო საქმის წარმოება. კომისიის წევრების ახსნა–განმარტების საფუძველზე იმსჯელებს კომისია და მიიღებს გადაწყვეტილებას“, – ამბობს N37–ე ახალციხის საოლქო საარჩევნო კომისიის თავმჯდომარე თეა გავაშელი.
საოლქო კომისიაში სხდომა დღეს, საღამოს, 5 საათზეა ჩანიშნული.
სვირის საუბნო კომისიის წევრები საოლქო კომისიაში ახსნა–განმარტებებს წერენ„სამხრეთის კარიბჭე“ გუშინ მთელი დღის განმავლობაში ცდილობდა „ქართული ოცნების“ ახალციხის შტაბის ხელმძღვანელთან გიორგი გვარამაძესთან დაკავშირებას. თუმცა, უშედეგოდ. გვარამაძე არც სატელეფონო ზარებს პასუხობს და შტაბში არაერთხელ მისულ „სამხრეთის კარიბჭესაც“ არცერთხელ არ შეხვდა. შტაბში გვეუბნებოდნენ, რომ გვარამაძე საქმეზეა გასული და იქვე მიგვითითეს, რომ შტაბში დარეკვის გარეშე არ მივიდეთ.
[ვარლამ წიკლაური, ახალციხე]
სტატია ქვეყნდება პროექტის „გაცნობიერებული არჩევანი–დემოკრატიის ფუნდამენტი“ ფარგლებში. ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ ”ღია საზოგადოება-საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.