სვირის საუბნო კომისიის თავმჯდომარე ბუღუტი ღონღაძე და მდივანი ეკატერინე ხალაძესვირის უბანზე „ნაციონალური მოძრაობის“ წევრ ნათელა ბიბლურის ჯერ არჩევასა და შემდეგ გადარჩევაზე, რასაც პარტია „ოცნების“ ზეწოლას უკავშირებდა, N37–ე ახალციხის საოლქო კომისიამ დღეს, 10 სექტემბერს, საღამოს იმსჯელა. სხდომას ახალციხის სოლქო კომისიის 13–ვე და სვირის საუბნო კომისიის წევრები ესწრებოდნენ.
N37–ე, ახალციხის საოლქო კომისიის თავმჯდომარემ თეა გავაშელმა სვირის საუბნო კომისიის წევრების, მდივნისა და თავმჯდომარის ახსნა–განმარტებები წაიკითხა. დოკუმენტში 8 სექტემბერს ჩატარებული სხდომის მიმდინარეობა იყო აღწერილი.
ახსნა–განმარტებების მიხედვით, 8 სექტემბერს, სოფელ სვირის საარჩევნო უბანზე ჩატარებულ პირველ სხდომაზე მდივნად „ნაციონალური მოძრაობის“ წარმომადგენელი ნათელა ბიბილური აირჩიეს.
„ნათელა ავირჩიეთ, მაგრამ მერე თქვა, რომ ვერ შევძლებო და იგი ეკატერინე ხალაძით შევცვალეთ“, – ნათქვამი იყო და ეს სხდომაზე სიტყვიერადაც დაადასტურა, სვირის საუბნო კომისიის თავმჯდომარემ ბუღუტი ღონღაძემ. იგივეს ამბობდა მისი მოადგილე თეიმურაზ კაპანაძე.
თეა გავაშელის შეკითხვაზე, არსებობს თუ არა, ნათელა ბიბილურის ხელმოწერილი დოკმენტი, რომელშიც იგი მდივნობაზე უარს ამბობს, სვირის საარჩევნო კომისიის წევრებმა განაცხადეს, რომ არა.
საოლქო კომისიაში გამართულ სხდომაზე ბუღუტი ღონღაძე ირწმუნებოდა, რომ როდესაც ნათელა ბიბილურმა მდივნის პოსტი საკუთარი ნებით დატოვა, ახალ მდივნად ეკატერინე ხალაძე აირჩიეს.
ამ განცხადებას საოლქო კომისიის წევრების შეკითხვები მოჰყვა. კომისიის წევრები ბუღუტი ღონღაძეს, ასევე კომისიის სხვა წევრებს ეკითხებოდნენ, ჩატარდა თუ არა ახალი სხდომა, სადაც დააყენეს ახალი მდივნის, ეკატერინე ხალაძის კანდიდატურა. წევრები პასუხობდნენ, რომ ოქმი არ არსებობს.
მეორე სხდომა, რომ არ ჩატარებულა და არც ახალი მდივანი აურჩევიათ, ამის შესახებ საუბნო კომისიის ოთხმა წევრმა განაცხადა. თუმცა, ოქმში, რომელიც ბუღუტი ღონღაძემ საოლქოში წარადგინა და რომელშიც მდივნად ხალაძე წერია, ოთხივე მათგანის ხელმოწერაა.
„საიდან წერია ჩვენი თანხმობა, უცნობია“,– ამბობენ კომისიის წევრები.
„ჩემი ხელით შევავსე ჟურნალი, ოქმი, განკარგულება და ხელი მოვაწერე. მერე გადავეცი კომისიის თავმჯდომარეს ბუღუტი ღონღაძეს“, – ირწმუნება ნათელა ბიბილური.
ნათელა ბიბილურიბიბილურის ამ განცხადებას სვირის საარჩევნო კომისიის თავმჯდომარე, მისი მოადგილე და კომისიის წევრებიც დაეთანხმნენ. ის, რომ ნათელა ბიბილურმა განკარგულება შეავსო და კომისიის მდივნად აირჩიეს, ახალციხის საოლქო კომისიის ოთხმა წევრმაც დაადასტურა. ისინი სვირის საარჩევნო უბნაზე პროცესს აკვირდებოდნენ. ოთხივე მათგანის განცხადებით, მათ საარჩევნო უბანი მაშინ დატოვეს, როდესაც განგარგულება მდივნის, ნათელა ბიბილურის სახელით ივსებოდა. ისინი ამბობენ, რომ გადასცა თუ არა განკარგულება და ოქმი კომისიის თავმჯდომარეს ნათელა ბიბილურმა, აღარ უნახავთ.
მიუხედავად ამისა, საოლქოში წარდგენილ ოქმში დაფიქსირებული ეკატერინე ხალაძე ირწმუნებოდა, რომ მდივნად ის აირჩიეს: „მე ამირჩიეს და ოქმიც მე შევავსე“.
სხდომის მიმდინარეობისას სვირის საარჩევნო უბნის თავმჯდომარე შეუძლოდ გახდა.
„ყველამ ყველაფერი ძალიან კარგად იცით, რაც მოხდა უბანზე. მე აღარ შემიძლია, რაც გინდათ ის გადაწყვიტეთ“, – განაცხადა ბუღუტი ღონღაძემ და სხდომა რამდენიმე წუთით დატოვა.
სხდომიდან გამოსული ბუღუტი ღონღაძე ამბობდა, რომ სვირის საარჩევნო უბანზე გაუგებრობა მოხდა: „ეს რა გამაკეთებინეს, ამხელა კაცი ვარ და ასე არასდროს მინერვიულია. სამი დღეა არ მძინავს“.
შეკითხვაზე რაზე საუბრობდა, ბუღუტი ღონღაძემ პასუხისგან თავი შეიკავა.
სხდომა საოლქო კომისიაშიახალციხის საოლქო კომისიის თავმჯომარემ თეა გავაშელმა N20–ე სვირის საარჩევნო უბნის თავმჯდომარის ბუღუტი ღონღაძისა და მდივნის გადაყენების საკითხი დააყენა. საოლქო კომისიის წევრების უმრავლესობის გადაწყვეტილებით, ბუღუტი ღონღაძე და ეკატერინე ხალაძე თავმჯდომარისა და მდივნის პოზიციებიდან გადააყენეს. შესაბამისად, საოლქოში წარდგენილი ოქმის მესამე განკარგულება, სადაც კომისიის მდივნად და თავმჯდომარედ ბუღუტი ღონღაძე და ეკატერინე ხალაძე ფიქსირდებოდნენ, გაუქმდა.
საოლქო საარჩევნო კომისიის გადაწყვეტილებით, სვირის საარჩევნო უბანზე კომისიის მდივნად „ნაციონალური მოძრაობის“ წარმომადგენელი ნათელა ბიბილური დატოვეს, თუმცა მისი დანიშვნის განკარგულება არ არსებობს.
„ამ კომისიამ არ უარყო და აღიარა, რომ ნამდვილად სხდომაზე აირჩიეს ნათელა ბიბილური. სწორედ მისი არჩევის ლეგიტიმაცია დავტოვეთ ძალაში“, – განაცხადა თეა გავაშელმა.
რაც შეეხება კომისიის თავმჯდომარეს, გავაშელის თქმით, სვირის უბანზე ახალ თავმჯდომარეს აირჩევენ.
საოლქო კომისიის გადაწყვეტილებით კმაყოფილია თავად ბუღუტი ღონღაძე: „კომენტარს არ ვაკეთებ, მაგრამ ნამდვილად სწორი გადაწყვეტილება მიიღო კომისიამ“.
შეგახსენებთ,რომ ახალციხეში, N20–ე სვირის საარჩევნო უბანზე, კომისიის მდივნად „ნაცმოძრაობის“ წევრი 8 სექტემბერს აირჩიეს, თუმცა საოლქო კომისიაში შესულ ოქმში მდივნად სხვა პიროვნება დაფიქსირდა. „ნაცმოძრაობამ“ ეს ფაქტი კომისიის მუშაობაში „ქართული ოცნების“
ჩარევას დაუკავშირა. ამ საკითხზე პარტიამ სპეციალური
ბრიფინგიც მოაწყო.
[ვარლამ წიკლაური, ახალციხე]