ვინ ჩაატარებს არჩევნებს ახალციხეში – რა შეიცვალა საოლქო კომისიაში

საქართველოს საარჩევნო კოდექსის, მე–19 მუხლის მიხედვით, საოლქო საარჩევნო კომისია საქართველოს საარჩევნო ადმინისტრაციის მუდმივმოქმედი ტერიტორიული ორგანოა.

კომისია 13 წევრისგან შედგება. ამათგან, 5 წევრს, 5 წლის ვადით, სრული შემადგენლობის უმრავლესობით, ირჩევს ცესკო. არჩევნების დანიშვნის შემდეგ საოლქო საარჩევნო კომისიის 7 წევრს ნიშნავენ პარტიები, ხოლო 1 წევრს სრული შემადგენლობის უმრავლესობით ირჩევს ცესკო, შესაბამისი არჩევნების საბოლოო შედეგების გამოცხადებამდე დროის მონაკვეთით.

№37-ე ახალციხის საოლქო საარჩევნო კომისია 2016 წლის საპარლამენტო არჩევნებისათვის უკვე დაკომპლექტებულია. ბოლო 4 წელიწადში კომისიაში მუდმივმოქმედი წევრები არ შეცვლილან, შეიცვალა მხოლოდ მდივანი, თუმცა, ახალი წევრი არ მიუღიათ, მდივნის პოზიცია კომისიის წევრმა დაიკავა. თუ ოთხი წლის წინ სოფიკო ნებაძე კომისიის წევრი იყო, ახლა მდივნის პოზიციას იკავებს.

ბოლო ოთხი წლის განმავლობაში შეიცვალნენ: ნინო მიქაბერიძე, იგი თავმჯდომარის მოადგილე იყო და 2013 წლის არჩევნებზე ელგუჯა გოზალიშვილმა ჩაანაცვლა. ასევე მუდმივმოქმედი კომისიის წევრი აღარ არის ქეთინო მიშველიძე, რომელიც საარჩევნო ოლქში მდივნის პოზიციას იკავებდა. ამჟამად იგი სამცხე–ჯავახეთის სამხარეო ადმინისტრაციაში მუშაობს.

რაც შეეხება სააჩევნო კომისიების დროებით წევრებს, პარტიის მიერ დანიშნულ წევრებში, ყველა შეცვლილია, გარდა „ქართული ოცნების“ წარმომადგენლისა. მესამე არჩევნებია პარტია „ქართული ოცნებიდან“ კომისიის წევრი როინ თაქთაქიძეა.

კომისიის შემადგენლობა ასეთია:
1. თეა გავაშელი – საოლქო საარჩევნო კომისიის თავმჯდომარე ;
2. ელგუჯა გოზალიშვილი – თავმჯდომარის მოადგილე;
3. სოფიკო ნებაძე – მდივანი; (იყო წევრი, გახდა მდივანი)
4. ქეთევან ივანიძე – წევრი;
5. კარაპეტ კირაკოსიან – წევრი;
6. ლია სუდაძე – წევრი (ცესკოს მიერ წელს დანიშნული წევრი).
რაც შეეხებათ კვალიფიციური საარჩევნო სუბიექტების მიერ დანიშნულ წევრებს, ესენი არიან:

1. მირანდა კბილაშვილი – საქართველოს კონსერვატიული პარტია;
2. მარიეტა მელიქიძე – მრეწველობა გადაარჩენს საქართველოს;
3. ნათია დევაძე – თავისუფალი დემოკრატები;
4. ირინე ნათენაძე – გაერთიანებული დემოკრატიული მოძრაობა;
5. გიორგი ივანიძე – საქართველოს რესპუბლიკური პარტია;
6. ეკატერინე ჩიტაშვილი – ერთიანი ნაციონალური მოძრაობა;
7. როინ თაქთაქიძე – ქართული ოცნება.

შეგახსენებთ, საქართველოში საპარლამენტო არჩევნები 8 ოქტომბერს გაიმართება. საოლქო კომისიებმა უკვე დაასრულეს საუბნო საარჩევნო კომისიების წევრების არჩევა და უბნების საზღვრების დადგენა. ხვალიდან საოლქო კომისიებს უფლებამოსილმა პარტიებმა სუბნო საარჩევნო კომისიის წევრის დანიშვნის შესახებ გადაწყვეტილებები უნდა წარუდგინონ.

[ლუბა გიორგაძე, ახალციხე]