თეა წულუკიანი ახალციხეს სტუმრობს

წულუკიანის თქმით, არქივის მშენებლობა 2020 წელს დასრულდება და მასში რეგიონის ყველა მუნიციპალიტეტის დოკუმენტური არქივი მოიყრის თავს.

„დავათვალიერეთ მშენებლობა, რომელიც 2020 წელს გაიხსნება. აქ თავს მოიყრის რეგიონული არქივი ბორჯომიდან, ასპინძიდან, ახალქალაქიდან, ადიგენიდან და ნინოწმინდიდან, გაერთიანდება მთელი დოკუმენტური მეხსიერება“,- განაცხადა მინისტრმა.

არქიტექტურული პროექტის მიხედვით, არსებული შენობის რეაბილიტაციასთან ერთად, მის გვერდით შენდება სამსართულიანი არქივსაცავი, რომელიც შენობას პანორამული დერეფნებით დაუკავშირდება. მშენებლობის დასრულების შემდეგ შენობის საერთო ფართი 1200 მ2 იქნება, გაიზრდება საცავის ტერიტორიაც, აქ დაცულ დოკუმენტებს დაემატება ახალქალაქის, ნინოწმინდისა და ბორჯომის საარქივო ფონდები და საქმეთა რაოდენობა 250 ათასს გადააჭარბებს.

შენობა სრულად აღიჭურვება გათბობა-გაგრილებისა და ვენტილაციის თანამედროვე სისტემებით, ინვენტარითა და ავეჯით. მოქალაქეთათვის მოეწყობა სამკითხველო დარბაზი, კეთილმოეწყობა ეზო და მიმდებარე ტერიტორია.

რაც შეეხება, მშენებელობის დროს აღმოჩენილ 18-19 საუკუნის პერიოდის ნაგებობას, მინისტრის განცხადებით ის შენარჩუნდება და მასზე ტურისტული ბილიკი მოეწყობა.

„საინტერესოა, რომ ამ ადგილას მშენებლობისას აღმოჩნდა მე-18 საუკუნის ბოლოთი დათარიღებული საძირკვლები, რომელიც ჩვენ გადავწყვიტეთ რომ შევინარჩუნოთ. ამან მშენებლობის ვადები საგრძობლად გაზარდა, მაგრამ გვეამაყება ის რომ ვაძლიერებთ რა ეროვნულ არქივს, რომელიც ჩვენი კულტურული მემკვიდრეობის სადარაჯოზე დგას. აღმოჩენები რაც შეიძლება მშენებლობისას იყოს ვიცავთ მათაც და მოეწყობა ტურისტული ბილიკები ამ საძირკველის ნანგრევებიზე. ეს იმისთვის რომ ახალციხეში ჩამოსულმა ტურისტებმა ამ მხრივადაც გაიცნონ სამცხე-ჯავახეთი და ახალციხე“, - განაცხადა წულუკიანმა.

შენობის რეაბილიტაცია და ახალი საცავის მშენებლობა 2017 წელს დაიწყო, თუმცა ძველი ფრაგმენტების აღმოჩენის შემდეგ პროექტი შეიცვალა და 2019 წლის ორი აპრილიდან განახლდა.

მშენებლობას ტენდერში გამარჯვებული შპს „ხომერიკი და კომპანია“ ახორციელებს.





[მარიამ ბარძიმაძე, ახალციხე]