სოფელ ჩორჩანში მსხვილფეხა რქოსანი პირუტყვი იხოცება

ჩორჩანში ამბობენ, რომ საქონლის დაცემა ორი კვირის წინ დაიწყო. სამი ძროხა მოკვდა, ხუთი კი დაავადებულია და მკურნალობენ.

„ვერ დადიოდა, ცოტას იწველებოდა, ვიდრე ჩვენ გავიგეთ, რომ დაავადება ჰქონდა, დაიღუპა. კიდევ ორ ოჯახს დაეხოცა ძროხები“, - ამბობს ფირუზ კილაძე.

ჩორჩნელები ამბობენ, რომ დაავადების დასადგენად პირუტყვისათვის ლაბორატორიული კვლევა არ გაუკეთებიათ. ძროხებს ადგილობრივი ვეტერინარი ამირან ჭიტაძე მკურნალობს.

„პირუტყვის სიმპტომების მიხედვით, პიროპლაზმოზია, რომელიც საქონელში ტკიპით გადადის. მე ახლა აცრებს ვუკეთებ და ვმკურნალობ“, - ამბობს ვეტერინარი.

მისივე თქმით, ამ ეტაპზე სოფელ ჩორჩანის გარდა, მიმდებარე სოფლებში დაავადება არ გამოვლენილა.

[ლუბა გიორგაძე, ადიგენი]