სოფელ ანდრიაწმინდაში მსხვილფეხა რქოსანი პირუტყვი იხოცება

სოფელ ანდრიაწმინდაში 50–მდე ძროხა უკვე მოუკვდათ. ადგილობრივები ამბობენ, რომ დაავადებული პირუტყვი რამდენიმე საათში კვდება. მკვდარ პირუტყვს მეპატრონე მიწაში მარხავს.

დეპუტატის ტარიელ ტაბატაძის განმარტებით, ამ დრომდე სოფელში არავინ ასულა და მოსახლეობის ბედით არ დაინტერესებულა.

„ვისაც მივაკითხეთ, ყველამ გვითხრა, ჩვენ არ გვეხება, თქვენს თავს თავად მიხედეთო. ერთ წამალში 20 ლარის გადახდა გვიწევს. აქ რომ ვეღარ ვიშოვეთ, თბილისში დავაბარეთ და იქიდან ველოდები წამალს რომ წავიღო და პირუტყვი ავცრათ“, – ამბობს იგი.

მიუხედავად ამისა, დეპუტატს აღნიშნული პრობლემის შესახებ საკრებულოსთვის არ მიუმართავს.

ტარიელ ტაბატაძის განმარტებით, პირუტყვს დაავადება მთაში გაუჩნდა და რადგან იქ მკურნალობა ვერ შეძლეს, სოფელში ჩამოიყვანეს. ადგილობრივები ამბობენ, რომ იმ მთაში სხვა სოფლის ძროხებიც ბალახობენ და შესაძლოა დაავადება სხვაგანაც გავრცელდეს.

სურსათის უვნებლობის სამსახურის სამცხე–ჯავახეთის რეგიონული სამსახურის უფროსის ლია ბექაურის განმარტებით, პირველადი დიაგნოზით, ეს დაავადება პასტერელოზია. დაავადება არ შედის სახელმწიფო პროგრამაში და შესაბამისად, მოსახლეობას დაავადებული პირუტყვის განკურნება თავად მოუწევს.

„პასტერელოზი არ მიეკუთვნება განსაკუთრებით საშიშ დაავადებას. სამწუხაროდ, მოსახლეობამ თვითონ უნდა მიიყვანოს კერძო ვეტერინარი“, – ამბობს ლია ბექაური.

მისივე თქმით, დაავადებული საქონლის ხორცის საკვებად გამოყენება ლაბორატორიული გამოკვლევის გარეშე არ შეიძლება: „დაავადებული და იძულებით დაკლული ცხოველის ხორცი არ შეიძლება შეუზღუდავად გაიშვას, არავითარ შემთხვევაში არ შეიძლება გაიყიდოს. სასაკლაოზე არის ვეტერინარი, რომელიც ცხოველს ამოწმებს და დაავადებულს არავინ დაკლავს“.

ახალციხის მუნიციპალიტეტის გამგეობაში პირუტყვის დაავადების შესახებ ინფორმაციას ფლობენ, თუმცა აცხადებენ, რომ ადგილობრივი ბიუჯეტიდან ცხოველის სამკურნალოდ თანხის გამოყოფის უფლება არ აქვთ. მოსახლეობისთვის კონსულტაციის გასაწევად კი უკვე მიმართეს სოფლის მეურნეობის განვითარების სააგენტოს.

პასტერელოზი (ბოღმა): ინკუბაციური პერიოდი ხანმოკლეა, გრძელდება რამოდენიმე საათიდან 2 – 3 დღემდე. მიმდინარეობს ძირითადად ზემწვავე და მწვავე ფორმით, აღინიშნება დაავადების ქვემწვავე და ქრონიკული ფორმაც. ზემწვავე ფორმის დროს კლინიკური ნიშნები გამოხატული არ არის, ცხოველი სწრაფად კვდება მაღალი ტემპერატურით. მწვავე ფორმის დროს მსხვილ რქოსან პირუტყვს უზიანდება ნაწლავები და სასუნთქი ორგანოები, ვითარდება შეშუპება კისრისა და ყბის მიდამოში. დაავადებულ ცხოველს აღენიშნება მოდუნება, ცხვირიდან სეროზულ ჩირქოვანი გამონადენი, კონიუქტივიტი. თუ დაავადებულ ცხოველს მკურნალობა დროზე არ ჩაუტარდა, იგი სწრაფად კვდება.

[თინათინ ზაზაძე, ახალციხე]