”რესპუბლიკელებმა” ახალციხეში თავმჯდომარე აირჩიეს

“საქართველოს რესპუბლიკური პარტიის” ახალციხის რაიონული ორგანიზაცია მუშაობას ძველ ოფისში აგრძელებს, სადაც რამდენიმე თვის განმავლობაში კოალიცია ”ქართული ოცნების” ახალციხის შტაბი იყო გახსნილი. პარტიის სხდომაზე, რომელიც დღეს გაიმართა ახალციხის რაიონული ორგანიზაციის კომიტეტის შვიდი წევრი და რაიონული ორგანიზაციის თავმჯდომარე აირჩიეს. ფარული კენჭისყრით კომიტეტის წევრებად თამარ გოგოლაძე, მაკა კაჭკაჭიშვილი, მერი ხაბეიშვილი, ზაზა ლომიძე, კახაბერ ლომიძე, ბელა ვარდიძე და სოსო კაპანაძე დასახელდნენ.

კომიტეტის წერვებმა კი ახალციხის რაიონული ორგანიზაციის თამჯდომარედ ისევ თამარ გოგოლაძე აირჩიეს. გოგოლაძე ”საქართველოს რესპუბლიკური პარტიის” ახალციხის რაიონულ ორგანიზაციას 2006 წლიდან ხელმძღვანელობდა.

- ”რაიონულმა კომიტეტმა მიიღო გადაწყვეტილება, რომ თავმჯდომარე ისევ მე ვყოფილიყავი. თავმჯდომარე ასახელებს მოადგილეს, ჩემი მოადგილე ზაზა ლომიძე იქნება”, - განმარტავს ახალციხის მუნიციპალიტეტის გამგებლის მოადგილე, ”საქართველოს რესპუბლიკური პარტიის” ეროვნული კომიტეტის წევრი და ახალციხის რაიონული ორგანიზაციის თავმჯდომარე თამარ გოგოლაძე.



აღნიშნულ კრებაზე ახალციხის რაონული ორგანიზაციის სამ კაციანი სარევიზიო კომისიის წევრებიც აირჩიეს. კომისიის თავმჯდომარედ გოგი ივანიძე დასახელდა.

კრების დაწყებამდე რესპუბლიკური პარტიის ახალციხის რაიონული ორგანიზაციის წევრებს პარტიის ერთ-ერთი დამფუძნებელი დავით ბერძენიშვილი შეხვდა. ბერძენიშვილი სამცხე-ჯავახეთში ორდღიანი ვიზიტით იმყოფება.

”თამარ გოგოლაძე წლების განმავლობაში ”რესპუბლიკელების” ხელმძღვანელი იყო, დღეს ის ახალციხის მუნიციპალიტეტის გამგებლის მოადგილეა. ამიტომ, ახალციხეში ჩვენ ხალხის წინაშე გარკვეული პასუხისმგებლობა გვაქვს აღებული”, - განაცხადა დავით ბერძენიშვილმა.

ორი დღის განმავლობაში ბერძენიშვილი ყველა რაიონული ორგანიზაციის წარმომადგენლებს შეხვდება.

ახალციხის შემდეგ საქართველოს რესპუბლიკური პარტიის რაიონული ორგანიზაციის კრება ადიგენში გაიმართა. ხვალ კი შეხვედრები ასპინძასა და ახალქალაქშია დაგეგმილი.

- ”რესპუბლიკურ პარტიას ახალქალაქში ძალიან მძლავრი ორგანიზაცია აქვს. ეს ის ხალხია, რომლებიც სიმშვიდის უზრუნველსაყოფად მუშაობენ და ბედნიერი ვარ, რომ ჩვენ მოგვეცა შესაძლებლობა, ერთიან ქართულ სახელმწიფოებრივ პოლიტიკურ სივრცეში ჯავახეთიც აქტიურად იყოს ჩართული”, - განაცხადა ბერძენიშვილმა.



[თამარ თოთაძე, ახალციხე]