ასპინძაში ‘ოცნების’ საოლქო ორგანიზაციის თავმჯდომარედ როსტომ მაგრაქველიძე აირჩიეს

პარტია „ქართული ოცნება“ რეგიონებში კონფერენციების გამართვასა და საოლქო ორგანიზაციების განახლებას აგრძელებს.

15 აპრილს „ქართული ოცნების“ რეგიონულ კონფერენციაზე როსტომ მაგრაქველიძის კანდიდატურა პარტიის წევრებს, პარლამენტარმა დიმიტრი სამხარაძემ წარუდგინა.

ახლადარჩეული ასპინძის საოლქო ორგანიზაციის თავმჯდომარე, ამბობს, რომ მოსახლეობასთან მჭიდრო კავშირი ექნება – „მოსახლეობასთან ხშირი შეხვედრები მექნება, მათ აზრს გავითვალისწინებ და ყველა განსახორციელებელ თუ მიმდინარე პროექტებში ჩართულები იქნებიან“.

რეგიონულ კონფერენციაზე, ასევე აირჩა ბიუროს ხუთი წევრი და 150 დელეგატი.

საოლქო ორგანიზაციის თავმჯდომარის პოზიციაზე, როსტომ მაგრაქველიძემ ასპინძის საკრებულოს თავმჯდომარე მამუკა მელიქიძე ჩაანაცვლა. მელიქიძე „ქართული ოცნების“ დელეგატებმა 2013 წელს აირჩიეს.

შეგახსენებთ, რომ „ქართული ოცნების“ რეგიონული კონფერენციები გაიმართა ახალციხესა და ბორჯომშიც. ახალციხეში საოლქო ორგანიზაციის თავმჯდომარედ ახალციხე–ადიგენის მაჟორიტარი გიორგი კოპაძე, ბორჯომში კი მერი ლევან ლიპარტია აირჩიეს.

[ლუბა გიორგაძე, ასპინძა]