პარტიები საუბნო კომისიებისთვის წევრებს არჩევენ

პარტიებს, უბნებზე წევრების შესარჩევად და ამ ინფორმაციის საოლქო კომისიისთვის მისაწოდებლად, ვადა 29 აგვისტოს ჩათვლით აქვთ.
საარჩევნო კანონმდებლობის მიხედვით, უფლებამოსილ პარტიებს შესაძლებლობა აქვთ საუბნო კომისიის წევრად დანიშნონ საქართველოს ქმედითუნარიანი მოქალაქე18 წლის ასაკიდან.

ხოლო კომისიის წევრად არ შეიძლება დაინიშნოს:
ა) პირი, რომელიც საქართველოს საარჩევნო კანონმდებლობის დარღვევისათვის საარჩევნო კომისიამ ან სასამართლომ გაათავისუფლა საქართველოს საარჩევნო ადმინისტრაციაში დაკავებული თანამდებობიდან (გათავისუფლების დღიდან 8 წლის განმავლობაში);
ბ) პირი, რომლის მიერ საქართველოს საარჩევნო კანონმდებლობის დარღვევა დაადასტურა სასამართლომ (სასამართლოს გადაწყვეტილებიდან 8 წლის განმავლოაბში)
გ) ნასამართლევი პირი (გარდა იმ შემთხვევისა, როდესაც პირს სანქციის სახით შეფარდებული აქვს ჯარიმა); დ) საქართველოს პარლამენტის წევრი, პარლამენტის აპარატის უფროსი;
ე) საქართველოს, აგრეთვე ავტონომიური რესპუბლიკის მინისტრები და მათი მოადგილეები;
ვ) სამინისტროს დეპარტამენტებისა და სამმართველოების ხელმძღვანელები;
ზ) ადგილობრივი თვითმმართველობის წარმომადგენლობითი და აღმასრულებელი ორგანოების ხელმძღვანელები : საკრებულოს თავმჯდომარე, მერი, გამგებელი და მათი მოადგილეები;
თ) სამხედრო მოსამსახურეები, საქართველოს შინაგან საქმეთა, თავდაცვის და სასჯელაღსრულებისა და პრობაციის სამინისტროების, საქართველოს სახელმწიფო უსაფრთხოებისა და დაზვერვის სამსახურების, სახელმწიფო დაცვის სპეციალური სამსახურისა და საქართველოს ფინანსთა სამინისტროს საგამოძიებო სამსახურის მოსამსახურეები;
ი) მოსამართლეები და მათი თანაშემწეები;
კ) პროკურატურის თანამშრომლები;
ლ) საარჩევნო სუბიექტი/სუბიექტობის კანდიდატი და მისი წარმომადგენელი;
მ) დამკვირვებელი.

საუბნო საარჩევნო კომისიის წევრად შეიძლება დაინიშნოს საჯარო მოხელე (გარდა ჩამოთვლილი ,,დ“–დან,,კ“ პუნქტის ჩათვლით). მას დროებით შეუჩერდება უფლებამოსილება საჯარო სამსახურში, რისთვისაც, კანონით დადგენილი წესით ეძლევა ანაზღაურება.

პარტიების მიერ წარდგენილ საუბნო საარჩევნო კომისიის წევრთა მიხედვით, უბნები საბოლოოდ დაკომპლექტდება.

საარჩევნო კოდექსით განსაზღვრულია, რომ თითოეული უბანი 13 კომისიის წევრით უნდა დაკომპლექტდეს. მათგან ექვსს საოლქო საარჩევნო კომისია განაცხადების საფუძველზე არჩევს, 7 წევრს კი პოლიტიკური პარტიები არჩევენ.

საპარლამენტო არჩევნებისათვის, ქვეყნის მასშტაბით, საარჩევნო უბნები 8 სექტემბერს გაიხსნება.

[თაკო ფეიქრიშვილი, ახალციხე]