ახალციხე და ადიგენი ერთ საარჩევნო ოლქად გაერთიანდა; საერთო დეპუტატი ეყოლებათ ახალქალაქსა და ნინოწმინდასაც, თუმცა, ახალქალაქი ნინოწმინდას 17 სოფლის გარეშე მიუერთდა; ახალქალაქის ხუთი თემი, 17 სოფელი ( თემები: აზავრეთი, კოჭიო, პტენა, ბარალეთი და ჩუნჩხა) ასპინძასა და ბორჯომთან გააერთიანეს;
„საარჩევნო კოდექსში“ ცვლილება ხმების გათანაბრების მიზნით შევიდა. დაახლოებით 50.000 ამომრჩეველს პარლამენტში ერთი მაჟორიტარი დეპუტატი უნდა ჰყავდეს.
საარჩევნო კოდექსში შესული ცვლილების შემდეგ, 2016 წლის საპარლამენტო არჩევნებისთვის, აგვისტოს მონაცემებით, N44 ახალციხე–ადიგენის მაჟორიტარულ საარჩევნო ოლქში, 50.008, N45–ე ბორჯომი–ასპინძის მაჟორიტარულ ოლქში 43.897, N46–ე ახალქალაქი–ნინოწმინდის მაჟორიტარულ ოლქში კი 51.627 ამომრჩეველია.
საზღვრების შეცვლის ქრონოლოგია
► 2015 წლის მაისში საქართველოს საკონსტიტუციო სასამართლომ, არაკონსტიტუციურად ცნო მაჟორიტარული საარჩევნო ოლქების განსაზღვრის აქამდე არსებული წესი.
► მოსარჩელეების (უჩა ნანუაშვილისა და მიხეილ შარაშიძის) მოსაზრებით, მაჟორიტარულ საპარლამენტო არჩევნებში ამომრჩეველთა ხმები არ იყო თანაბარი ძალის მქონე.
► საკონსტიტუციო სასამართლომ მათი სარჩელი დააკმაყოფილა და პარლამენტი დაავალდებულა, უზრუნველეყო ამომრჩეველთა თანაბარი მონაწილეობა საარჩევნო კოდექსში ისე, რომ დაცული ყოფილიყო ხმათა თანაბრობის პრინციპი.
(გამოყენებულია გამოცემა
"ნეტგაზეთის" ინფორმაცია)
ოპოზიციის კრიტიკა
► ოპოზიციაში ფიქრობენ, რომ ამგვარი დაყოფა ეთნიკური უმცირესობებისთვის პრობლემებს შექმნის. მოქალაქეებს მაჟორიტარებთან ურთიერთობაც გაურთულდებათ, ზოგს ენობრივი ბარიერის, ზოგს კი ტერიტორიული სიშორის გამო.
► „ახალციხეში თუ ექნება მაჟორიტარს ბიურო, ადიგენიდან სად უნდა იაროს ადგილობრივმა, რომ მას გასაჭირი უთხრას?!“ – ამბობს „გაერთიანებული დემოკრატიული მოძრაობის" წევრი ჯიმშერ გოგოლაური.
► „თავის თავზე მოირგო „ოცნებამ“ ოლქები. ის მუნიციპალიტეტები გააერთიანეს, სადაც 2012–ში არჩევნები წააგეს“, – ამობს "ერთიანი ნაციონალური მოძრაობის" წევრი, პარლამენტში ადიგენის მაჟორიტარი ზურა ჩილინგარაშვილი.
(სამხრეთის კარიბჭეს
არქივიდან)
წინა საპარლამენტო არჩევნების შედეგები
შეგახსენებთ, 2012 წლის საპარლამენტო არჩევნებში, სამცხე–ჯავახეთში "ქართულმა ოცნებამ" მხოლოდ ბორჯომის ოლქში მოიგო. "ქართული ოცნების" მაჟორიტარი დეპუტატობის კანდიდატმა გედევან ფოფხაძემ ხმების 58.01% მიიღო, "ერთიანი ნაციონალური მოძრაობის" კანდიდატმა მამუკა ხვედელიანმა კი 36.54%.
N36 ბორჯომის მაჟორიტარული ოლქის შედეგები, 2012 წ. 1 ოქტომბრის არჩევნები ამ ოლქის გარდა, რეგიონის ყველა დანარჩენ ოლქში წინა საპარლამენტო არჩევნებში "ერთიანი ნაციონალური მოძრაობის" კანდიდატებმა "ქართული ოცნების" კანდიდატებს დიდი უპირატესობით მოუგეს.
ახალციხე:"ქართული ოცნება", გურამ კუტალაძე – 18.03%
"ერთიანი ნაციონალური მოძრაობა", ვაჟა ჩიტაშვილი – 80.37%
ადიგენი"ქართული ოცნება", ბიძინა გუჯაბიძე – 25.65%
"ერთიანი ნაციონალური მოძრაობა", ზურაბ ჩილინგარაშვილი – 74.35%
ასპინძა"ქართული ოცნება", თემურ მაისურაძე – 20.92%
"ერთიანი ნაციონალური მოძრაობა", ტარიელ ლონდარიძე – 76.36%
ახალქალაქი"ქართული ოცნება", ნორიკ კარაპეტიანი – 20.13%
"ერთიანი ნაციონალური მოძრაობა", სამველ პეტროსიანი – 77.7%
ნინოწმინდა "ქართული ოცნება", ალბერტ ნურბეგიანი – 14.93%
"ერთიანი ნაციონალური მოძრაობა", ენზელ მკოიან –83.57%
პ.ს. ენზელ მკოიანი ახლა ნინოწმინდა–ახალქალაქის მაჟორიტარულ ოქლში "ქართული ოცნების"
კანდიდატია.
როგორ გადანაწილდა ადმინისტრაციები
საზღვრების შეცვლის შედეგად, სამცხე–ჯავახეთში ჩამოყალიბდა სამი მაჟორიტარული ოლქი: N44–ე ახალციხე–ადიგენის, N45–ე ბორჯომი–ასპინძის და N46–ე ახალქალაქი–ნინოწმინდის.
N44–ე ახალციხე–ადიგენის ოლქში, №37ახალციხის საოლქო საარჩევნო კომისია ძირითადი, ხოლო №38 ადიგენის საოლქო საარჩევნო კომისია დამხმარეა;
N45–ე ბორჯომი–ასპინძის ოლქში ძირითადი N36 ბორჯომის, ხოლო დამხმარე N39 ასპინძის საოლქო კომისიაა;
N46–ე ახალქალაქი–ნინოწმინდის ოლქში კი ძირითადი №40 ახალქალაქის, ხოლო დამხმარე №41 ნინოწმინდის საოლქო საარჩევნო კომისიაა.
სამცხე–ჯავახეთის მასშტაბით არსებული ექვსი საარჩევნო ოლქის ხარჯი 157 826 ლარს შეადგენს.
სახსრები შემდეგნაირად გადანაწილდა:
N36 ბორჯომის საარჩევნო ოლქი – 31 110 ლარი;
N37 ახალციხის საარჩევნო ოლქი – 30 830 ლარი;
N38 ადიგენის საარჩევნო ოლქი – 18 433 ლარი.
N39 ასპინძის საარჩევნო ოლქი – 19 883 ლარი;
N40 ახალქალაქის საარჩევნო ოლქი – 31 783 ლარი;
N41 ნინოწმინდის საარჩევნო ოლქი – 25 787 ლარი;
[ნინო ნარიმანიშვილი, ახალციხე]