რიოს ოლიმპიადა დასრულდა - რა შედეგით დაბრუნდა საქართველო

მედალოსანი ქართველები არიან:
ოქრო - ძალოსანი ლაშა ტალახაძე და თავისუფალი სტილით მოჭიდავე ლადო ხინჩეგაშვილი;
ვერცხლი - ძიუდოისტი ვარლამ ლიპარტელიანი;
ბრინჯაო - ძიუდოისტი ლაშა შავდათუაშვილი, ბერძნულ-რომაული სტილით მოჭიდავე შმაგი ბოლქვაძე, ძალოსანი ირაკლი თურმანიძე და თავისუფალი სტილით მოჭიდავე გენო პეტრიაშვილი.

ამ შედეგით საქართველომ ოლიმპიადაზე 38–ე ადგილი დაიკავა. ოლიმპიადაზე 207 ქვეყანა მონაწილეობდა და მათგან მედლები 78-მა მოიპოვა.

საქართველოს სპორტის სამინისტროს ინფორმაციით, რიო დე ჟანეიროს ოლიმპიური თამაშებზე საქართველოს დელაგაცია 40 სპორტსმენით იყო წარმოდგენილი, რაც სარეკორდო მაჩვენებელია საქართველოს დამოუკიდებლობის შემდეგ.

ქართველი ოლიმპიელები სპორტის 13 სახეობაში მონაწილეობდნენ: ძიუდო (8 სპორტსმენი), თავისუფალი ჭიდაობა (6), ბერძნულ-რომაული ჭიდაობა (5), მძლეოსნობა (5), ძალოსნობა (4), მშვილდოსნობა (3), ტყვიის სროლა (2), ცურვა (2), ბატუტზე ხტომა (1), მხატვრული ტანვარჯიში (1), ფარიკაობა (1), ჩოგბურთი (1), კანოე (1).

ქართველ ოლიმპიელთა შორის 2 ოლიმპიური ჩემპიონი იყო (ნინო სალუქვაძე 1988, ლაშა შავდათუაშვილი 2012), 2 ოლიმპიური პრიზიორი, 4 მსოფლიოს ჩემპიონი, 19 ევროპის ჩემპიონი და პრიზიორი.

ოლიმპიურ თამაშებში მონაწილეობის გამოცდილება აქვე 12 სპორტსმენს. მერვე ოლიმპიადაზე გამოვიდა ტყვიის მსროლელი ნინო სალუქვაძე, მეოთხე ოლიმპიადაზე - მშვილდოსანი ხათუნა ნარიმანიძე, მესამეზე - ბატუტზე მხტომელი ლუბა გოლოვინა და მშვილდოსანი ქრისტინე ესებუა.

ოლიმპიური თამაშების ყველაზე ახალგაზრდა მონაწილე ნინო სალუქვაძის შვილი, 18 წლის ტყვიის მსროლელი ცოტნე მაჭავარიანი იყო. ოლიმპიური თამაშების ისტორიაში ეს პირველი შემთხვევა იყო როდესაც სპორტსმენის სტატუსით მონაწილეობდნენ დედა და შვილი.

[ნინო ნარიმანიშვილი, ახალციხე]