ქართველი ოლიმპიელები ჯანსაღი ცხოვრების წესის პროპაგანდას ცდილობენ

საქართველოს ეროვნული ოლიმპიური კომიტეტისა და საქართველოს ოლიმპიელთა კლუბის ორგანიზებით, ქართველმა ოლიმპიელებმა რეგიონებში ვიზიტები სამცხე-ჯავახეთიდან დაიწყეს.

ექვსი ოლიმპიური ჩემპიონი: ნინო სალუქვაძე, რომან რურუა, ლაშა შავდათუაშვილი, რამაზ ნოზაძე, რუსუდან ხოფერია და ჯუმბერ ლეჟავა, ახალციხეს გუშინ, 18 ოქტომბერს ესტუმრა.

„ჩვენი მიზანია შევხვდეთ საზოგადოებას და ვუამბოთ როგორ შეიძლება მიაღწიო დიდ შედეგებს ცხოვრებაში. ჩვენ ვნერგავთ ჯანმრთელი ცხოვრების წესს. ამ მხრივ ქვეყანაში რეგრესია, სპორტი დაეცა საქართველოში, ექვსი წელია ინდივიდუალურ სახეობაში მსოფლიო და ოლიმპიური ჩემპიონი არ გვყოლია. გვინდა ოლიმპიელთა კლუბს და ოლიმპიურ კომიტეტს შევხვდეთ, ხალხს ავუხსნათ, ვაჩვენოთ მაგალითები და ვუთხრათ, რომ ჯანმრთელობისთვის ყველამ ვიშრომოთ“,-ამბობს გინესის 16-გზის რეკორდსმენი, მსოფლიო მოგზაური ჯუმბერ ლეჟავა.

ოლიმპიელებმა გუშნვე გამართეს მთელი რიგი ღონისძიებები. მათ შორის, სპორტული ვიქტორინა. გამარჯვებულები კი სპორტის ენციკლობედიით, ქართული სპორტის ფოტო ისტორიით, ოლიმპიური კომიტეტის ჟურნალით და ასევე ჭიდაობასა და ოლიმპიელთა კლუბის პრეზიდენტ კახი კახნიაშვილზე (სამგზის ოლიმპირ ჩემპიონზე) არსებული წიგნებით დააჯილდოვეს.

შეხვედრები გუშინ ადგილობრივი თვითმმართველობის შენობაში მიმდინარეობდა. გარდა ვიქტორინისა, აჩვენეს ცნობილი სპორცმენებზე გადაღებული ვიდეორგოლები.

წიგნები საჩუქრად ახალციხის საჯარო სკოლებსაც გადაეცათ. თითო კომპლექტი, რომელიც 34 წიგნისგან არის შემდგარი და სადაც 34 ოლიპმიურ ჩემპიონზეა მოთხრობილი.

შეხვედრა ოლიმპიური კომიტეტის რეგიონული ორგანიზაციის ხელმძღვანელის ზიგმუნდ ზილბერშტეინის ორგანიზებით მოეწყო. შეხვედრას ადგილობრივი თვითმმართველობის, სპორტსკოლის წარმომადგენლები და ადგილობრივი მოსახლეობა დაესწრო.

მსგავსი შეხვედრა ახალციხის შემდეგ რაჭაში გაიმართება. ოლიმპიური კომიტეტის პირველი ვიცე-პრეზიდენტის გუჯა ბერიშვილის თქმით, ასეთი შეხვედრები საუკეთესო საშუალებაა მოსახლეობამ ჩემპიონები პირადად გაიცნოს. მიიღონ მათგან ავტოგრაფები და წიგნები.

[თინათინ ზაზაძე, ახალციხე]