ქართველი ოლიმპიელები სამშობლოში დაბრუნდნენ

ოლიმპიური დელეგაციის წევრებსა და სპორტსმენებს აეროპორტში საქართველოს სხვადასხვა რეგიონიდან ჩასული გულშემატკივრები დახვდნენ. აეროპორტში იმყოფებოდნენ ასევე სპორტისა და ახალგაზრდობის საქმეთა მინისტრი ტარიელ ხეჩიკაშვილი და დევნილთა მინისტრი სოზარ სუბარი.

"მინდა მადლობა გადავუხადო ყველა იმ ადამიანს, ვინც ამ დროის განმავლობაში გვგულშემატკივრობდა, ვისაც ჩვენს შესაძლებლობებში ეჭვი არ შეეპარა. ეს გამარჯვება არის თითოეული ჩვენგანის და მთელი საქართველოსი. ემოციები დღეს უფრო მეტად გვაქვს მოჭარბებული და ამდენი ადამიანის აქ ყოფნა ჩვენთვის დიდი ბედნიერებაა", - განაცხადა ლაშა ტალახაძემ.



სპორტისა და ახალგაზრდობის მინისტრის ტარიელ ხეჩიკაშვილის თქმით, ეს არის ქვეყნის წარმატება და სამინისტრო აქტიურად გააგრძელებს ქართველი სპორტსმენების მხარდაჭერას: "მინდა მადლობა გადავუხადო თითოეულ იმ ადამიანს, ვინც შრომა ჩადო და საქართველო მსოფლიო ასპარეზზე ასახელა. ჩვენ კიდევ ერთხელ დავამტკიცეთ, რომ ქართველი სპორტსმენები არიან ძლიერები. ეს არის ძალიან დიდი გამარჯვება და ჩვენ აქტიურად გავაგრძელებთ სპორტის სხვადასხვა სახეობის ხელშეწყობას".

2 ოქრო, 1 ვერცხლი და 4 ბრინჯაო – ეს შედეგი აქვთ ქართველ სპორტსმენებს ზაფხულის XXXI ოლიმპიურ თამაშებზე, რომელიც ბრაზილიაში 16 დღის განმავლობაში მიმდინარეობდა.



მედალოსანი ქართველები არიან:
ოქრო - ძალოსანი ლაშა ტალახაძე და თავისუფალი სტილით მოჭიდავე ლადო ხინჩეგაშვილი;
ვერცხლი - ძიუდოისტი ვარლამ ლიპარტელიანი;
ბრინჯაო - ძიუდოისტი ლაშა შავდათუაშვილი, ბერძნულ-რომაული სტილით მოჭიდავე შმაგი ბოლქვაძე, ძალოსანი ირაკლი თურმანიძე და თავისუფალი სტილით მოჭიდავე გენო პეტრიაშვილი.

ამ შედეგით საქართველომ ოლიმპიადაზე 38–ე ადგილი დაიკავა. ოლიმპიადაზე 207 ქვეყანა მონაწილეობდა და მათგან მედლები 78-მა მოიპოვა.



[sknews.ge]