ახალციხეში შესაძლოა თვითმმართველობის რიგგარეშე არჩევნები დაინიშნოს

ახალციხის მერი, გიორგი კოპაძე, „ქართულმა ოცნებამ“ ახალციხე – ადიგენის საარჩევნო ოლქში მაჟორიტარობის კანდიდატად დაასახელა. კოპაძე ამომრჩევლებს 7 აგვისტოს წარუდგინეს.

როგორც იურისტები განმარტავენ, გიორგი კოპაძეს უფლებ აქვს კანდიდატად დასახელებიდან 30 დღის განმავლობაში დარჩეს ახალციხის მერის პოზიციაზე. ამ დღეების განმავლობაში მან რეგისტრაციისთვის ცენტრალურ საარჩევნო კომისიას უნდა მიმართოს. კომისიისთვის მიმართვიდან ორი დღის ვადაში კი, მერის თანამდებობა ოფიციალურად უნდა დატოვოს.

ახალგაზრდა იურისტთა ასოციაციის იურისტი ირმა პავლიაშვილი განმარტავს, რომ იმ შემთხვევაში თუ თვითმმართველობის არჩევნებამდე ერთ წელზე მეტია დარჩენილი და ქალაქის მერმა თანამდებობა დატოვა, საარჩევნო კოდექსის მიხედვით შუალედური არჩევნები უნდა დაინიშნოს.

„არჩევნები ინიშნება, როდესაც მერის ან გამგებლის გადადგომიდან დარჩენილია წელიწადზე მეტი დრო. წელიწადს ერთი დღეც რომ გადასცდეს, უნდა დაინიშნოს არჩევნები. იმ შემთხვევაში თუ წელიწადზე ნაკლები დროა დარჩენილი, არჩევნები არ გაიმართება“,– ამბობს ირმა პავლიაშვილი. შუალედური არჩევნების დროს არჩეული ახალი მერი თანამდებობას იმ ვადით დაიკავებს, რაც ყოფილ მერს ჰქონდა დარჩენილი.

საქართველოს საარჩევნო კოდექსის 169–ე მუხლის მიხედვით მერის, გამგებლის უფლებამოსილების ვადამდე შეწყვეტის შემთხვევაში რიგგარეშე არჩევნებს ნიშნავს საქართველოს პრეზიდენტი, საქართველოს პრემიერ-მინისტრის კონტრასიგნაციით. მერის, გამგებლის უფლებამოსილების ვადამდე შეწყვეტიდან არაუადრეს მე-8 და არაუგვიანეს მე-10 დღისა. არჩევნები ტარდება არჩევნების დანიშვნიდან არაუგვიანეს 50-ე დღისა.
ახალციხის მერმა გიორგი კოპაძემ, გადადგომის შესახებ განცხადება უკვე დაწერა. როგორც ადმნისტრაციაში განმარტავენ, ხვალ მის განცხადებას საკრებულო ცნობად მიიღებს და მერის მოვალეობის შესრულება ვიცე–მერს, ილია ზარდიაშვილს დაეკისრება.

ადგილობრივი თვითმმართველობის მომავალი არჩევნები 2017 წლის ოქტომბერში უნდა გაიმართოს. ვინაიდან შემდეგ არჩევნებამდ ერთ წელზე მეტი რჩება, ახალციხეში შესაძლოა რიგგარეშე არჩევნები დაინიშნოს. ვინაიდან მერმა განცხადება უკვე დაწერა, იქნება თუ არა არჩევნები ახალციხეში, დაახლოებით 10 დღეში გაირკვევა.

[ვარლამ წიკლაური, ახალციხე]