პაატა ბურჭულაძის და ვაშაძე-ჯაფარიძე-კაციტაძის პარტიები გაერთიანდნენ

გაერთიანების შესახებ პარტიის ლიდერებმა 18 აგვისტოს განაცხადეს.

"მე დიდი მადლობა მინდა, გადავუხადო ჩვენს ყოფილ კოლეგებს, ახლა კი თანაგუნდელებს, რომლებიც შემოგვიერთდნენ ზუსტად მაშინ, როდესაც ჩვენს გუნდზე მიმდინარეობდა ძალიან დიდი ზეწოლა და დღესაც არის ძალიან დიდი პოლიტიკური წნეხი ჩვენზე. დღეიდან, ეს ბატონიშვილები ჩვენთან ერთად გაინაწილებენ ამ წნეხს, რისთვისაც მათ დიდ მადლობას ვუხდი, ეს გმირობის ტოლფასია. ჩვენ იმედის თვალით შემოგვყურებს მთელი საქართველო, უფრო სწორად 80%-ზე მეტი საქართველო, ვისაც უჭირს და ჩვენ ვიძლევით პირობას, რომ როგორც კი მოვალთ ხელისუფლებაში, ჩვენ მათ ცხოვრებას შევცვლით უკეთესობისკენ, საგრძნობლად უკეთესობისკენ და არა 4 წლის მერე, არამედ პირველივე თვეებში ისინი იგრძნობენ ამას. ცოტა დრო დარჩა მოთმინებისთვის, მე მინდა კიდევ გამოვაცხადო, რომ ჩვენი კარი ღიაა ყველასთვის, ვინც იზიარებს ჩვენს ხედვებს, რომლებიც თქვენ კარგად იცით - ეს არის პროდასავლური, ნატოში გაწევრიანება. ჩვენი ხედვები არის სწრაფი ეკონომიკური ზრდა და რაც მთავარია, სამართლიანი საქართველო. ცოტა დრო დარჩა და ყველაფერი ძალიან კარგად იქნება" - განაცხადა ბურჭულაძემ.

გირჩმა, "ახალმა საქართველომ" და "ახალმა მემარჯვენეებმა" თანამშრომლობა პაატა ბურჭულაძეს გუშინ შესთავაზეს.

“დღევანდელი ნაბიჯით, რომელიც ჩვენ გუშინ შეთავაზების სახით გადავდგით ბატონ პაატასთან მიმართებაში, და დღევანდელი ნაბიჯით ჩვენ ერთ რამეს ვუსვამთ ხაზს: გაერთიანება საქმის გარშემო არის ყველაზე მნიშვნელოვანი ქვეყნისათვის. ჩვენ უარს ვამბობთ ბოღმაზე, შურისძიებასა და დაპირისპირებაზე და ვიწყებთ ერთად საქმის კეთებას წარმატებისთვის და ქვეყნის გამარჯვებისთვის", – განაცხადა პარტია “ახალი საქართველოს” ლიდერმა გიორგი ვაშაძემ.

“დარწმუნებული ვარ რომ ეს პოლიტიკური ცენტრი იქნება სწორედ ის რომელიც მომავალში საქართველოში უზრუნველყოფს საქართველოს პროდასავლური კურსის მდგრადობას ერთი მხრივ და მათ შორის უზრუნველყოფს იმას რომ ქვეყანაში გატარდეს საჭირო შეიძლება მტკივნეული მაგრამ მნიშვნელოვანი ეკონომიკური რეფორმები. მე დარწმუნებული ვარ ამაშიც რომ ბევრი ცდის შემდეგ ჩვენ ყველა გამოვხედავთ ამ დღეს და სიამაყით ვიტყვით, რომ ეს იყო ის დღე როცა ჩვენ მივიღეთ მნიშვნელოვანი პოლიტიკური გადაწყვეტილება”, – განაცხადა “გირჩის” დამფუძნებელმა ზურაბ ჯაფარიძემ.

[sknews.ge]