800 თუ 330? – რამდენი ლამპიონი შეიცვალა ბორჯომის პარკში

5 აგვისტოს სტიქიამ ყველაზე მეტად ბორჯომის ისტორიული, ცენტრალური პარკი დააზარალა. ძლიერმა ქარმა ფესვიანად მოგლიჯა ასწლოვანი ხეები. ტოტებმა დააზიანა გარეგანათების ბოძები და ლამპიონები.

ბორჯომის პარკის დირექტორი ლადო გელაშვილი აცხადებს, რომ შეიცვალა დაახლოებით 800 ლამპიონი და 10–მდე განათების ბოძი.

„ბევრი იყო ლამპიონები და ყველა შეძენილია. ნუ 800 ლამპიონი ვთქვათ. დაახლოებით 4 იყო თუ 10 ბოძი და შეიცვალა. ზოგი გარემონტდა, გამაგრდა, გადაიბა და ა.შ. ხიდები კარგ მდომარეობაში იყო. ამ ეტაპზე ყველაფერი მოწესრიგებულია“, – ამბობს იგი.

რა ოდენობის თანხა დასჭირდა ამ ყველაფერის შესაძენად, გელაშვილი ასე გვპასუხობს: “არავის არაფერი არ გამოუყვია ჯერჯერობით. თანხები არც გასულა, არც შემოსულა. გაკეთდა ყველაფერი, ასე ვთქვათ პირადპირი მოლაპარაკებით, თანხები ჯერ არ დახარჯულა, ალბათ დაიხარჯება. ხელშეკრულება გვაქვს გაფორმებული. ორგანიზაცია ვართ და გვაქვს იმის შესაძლებლობა, რომ დაზიანულები შევცვალოთ“.

განსხვავებულ ინფორმაციას გვაწვდიან ბორჯომის მუნიციპალიტეტის გამგეობის საზოგადოებასთან ურთიერთობის სამსახურიდან:„ბორჯომის ცენტრალურ (ისტორიულ) პარკში 5 აგვისტოს სტიქიის შედეგად დაზიანებული ლამპიონები მთლიანად გამოიცვალა. აღდგენითი სამუშაოები ტერიტორიაზე უმოკლეს დროში შესრულდა. პარკის თანამშრომლებისა და ააიპ "გარე განათების" წარმომადგენლების ერთობლივი მუშაობით,განათების 110 ბოძზე 330 სანათი შეიცვლა“.

რა ოდენობის ზარალი მიადგა სტიქიის შედეგად ბორჯომის მუნიციპალიტეტს და მათ შორის ცენტრალურ პარკს ჯერ დათვლილი არ არის.

[თინათინ ზაზაძე, ბორჯომი]