ბორჯომის პარკში მომუშავე მეწარმეები: დავზარალდით და სეზონიც შეფერხდა

ბორჯომის პარკში მოტეხილმა ხემ გასართობი, ე.წ. თოკების პარკი გაუფუჭა ლაშა ხაჩიძეს.

"ერთი ხე გადმობრუნდა და თოკები ჩამიწყვიტა. ასე პარკი სულ გაფუჭდა. დაზიანებულ პარკზე რომ აღარაფერი ვთქვა, გაჩერებულები ვართ, ვეღარ ვმუშაობთ, ეს ხომ ჩვენს შემოსავალზე მნიშვნელოვნად აისახება. ხალხი შეშინებულია, ალბათ აღარ ჩამოვა", – ამბობს იგი.

ხაჩიძის მსგავსად, ზარალი მიიღო კიდევ ერთმა მეწარმემ, რომელიც ბორჯომის პარკში ნაყინებს ყიდდა: "მაცივარი ალბათ გადარჩება, მაგრამ პროდუქტი სულ გაფუჭდა".

გუშინდელმა სტიქიამ ორმაგად აზარალა კაფე–ბარი "ჩანჩქერი".

"ათასობით ლარის ზარალი მივიღეთ. სტიქიის დროს გარეთ ათობით მაგიდა იყო გაშლილი, ხალხს შეეშინდა და გადახდაზე აღარავინ ფიქრობდა. ალბათ 2000 ლარის შეკვეთები იყო. ჭურჭელს, სკამებსა და მაგიდებს ქარი ჰაერში აფრიალდებდა, ყველაფერი დაიმტვრა გარეთ რაც იყო", – გვეუბნებიან კაფე–ბარის თანამშრომლები.

ასევე მოტეხილი ხისგან დაზარალდა პოპ–კორნების გამყიდველი. მეპატრონე ამბობს, რომ აპარატის შეცვლა მოუხდება, რადგან იგი ხემ დააზიანა: "პოპკორნის დასამზადებელი მასალაც სტქიამ გაანადგურა"

ავტოდრომის ოპერატორი გიორგი ხუციშვილი ამბობს, რომ მისი ავტოდრომი ძალიან არ გაფუჭებულა, ტექნიკა მწყობრიდან არ გამოსულა, მხოლოდ წყალი შევარდა. იგი ვარადაუდობს, რომ 2–3 დღეში პარკი გაიხსნება და ტურისტული სეზონიც განახლდება.

ხუციშვილის ოპტიმიზმის გაზიარება უჭირს პარკში მეიჯარეების ზედამხედველს. იგი ფიქრობს, რომ ბორჯომში ტურისტული სეზონი ჩავარდა: „ერთი კვირა ალბათ პარკს არ გააღებენ. ამიტომ ბორჯომში დამსვენებელი აღარ გაჩერდება.

დილიდან პარკშია ბორჯომის ისტორიული პარკის დირექტორი ლადო გელაშვილი.

"დღეს, საღამოს, პარკის ქვედა ტერიტორია, სადაც დასასვენებელი ადგილია, გაიხსნება, ხვალ კი მთლიანი პარკი ამოქმედდება. ზარალზე ჯერ საუბარი ნაადრევია, ახლა ვითვლით", – ამბობს იგი და ამატებს, რომ დარწმუნებულია რომ ზარალი ძალიან დიდია.

შეგახსენებთ, გუშინ, 4 აგვისტოს, ბორჯომში ძლიერი ქარი, წვიმა და სეტყვა იყო. სტიქიამ ბორჯომი მნიშვნელოვნად აზარალა.

[თამუნა უჩიძე, ნინო ნარიმანიშვილი, ბორჯომი]