ქეთევან ხმალაძემ პროტესტის ნიშნად სასამართლო დარბაზი დატოვა

დღეს, 9 აგვისტოს ახალციხის რაიონულ სასამართლოში ნინოწმინდაში მომხადარი ქურდიბოსა და ყაჩაღობის საქმეზე სხდომა 7 საათზე მეტ ხანს გაგრძელდა. ჩვენება 9 მოწმემ მისცა. მათ შორის შვიდი პოლიციის ის თანამშრომელი იყო, რომელმაც მონაწილეობა სხვადასხვა საგამოძიებო ღონისძიებაში მიიღო.

პეტრე ობოლაშვილი, ლევან ნებაძე, ვიტალი მოდებაძე, გიორგი პეტაშვილი, დავით მელიქიძე, სანდრო ცაბუტაშვილი და ზურაბ ქავთარაძე იმის შესახებ თუ რა ვითარებაში მოხდა ბრლადებულების დაკავება ტყემლანაში, როგორ გაჩხრიკეს აქ ქეთევან ხმალაძის სახლი, ასევე როგორ ამოიღეს ბრალდებულ ივანე გ–ს მანქანა და ა.შ. ერთსა და იმავე სცენარს აღწერდნენ.

როგორც პოლიციის თანამშრომლები სასამართლოში ყვებოდნენ ბრლადებულებმა დაკავებისას წინააღმდეგობა გაუწიეს. ამიტომ მათ წინააღმდეგ პროპორციული ძალის გამოყენება დასჭრიდათ.

პოლიციელების თქმით, ბრლადებულები რომ არ გაქცეულიყვნენ ხელები გადაუგრიხეს და იატაკზე დააწვინეს. სწორედ ამ „პროპორციული ძალის გამოყენებით“ ახსნეს მათ ბრალდებულების სხეულსა და სახეზე არა ერთი დაზიანება. ადვოკატების შეკითხვაზე, რატომ სცემეს ბრალდებულები დაკავებისას, ყველა პოლიციელს ერთი პასუხი ჰქონდა: „მსგავს ფქტს ადგილი არ ჰქონია“.

თუმცა, როგორც სასამართლო დარბაზში ბრალდებულმა ქეთევან ხმალაძემ განაცხადა, იმ ღამეს მათ დასაკავებლად მისული პოლიციელები არა მხოლოდ ბრალდებულებს, არამედ მის 15 წლის შვილსაც სასტიკად გაუსწორდნენ: „რატომ სცემეთ ჩემი შვილი თოფის კონდახით?! რა გინდოდათ მასთან?!“

ხმალაძეს დღევანდელ პროცესზე ყველა მოწმის დაკითხვა არ მოუსმინია. მან ლევან ნებაძის დაკითხვისას სასამართლო დარბაზი პროტესტის ნიშნად დატოვა. ნებაძე ირწმუნებოდა, რომ მაშინ როცა ხმალაძის სახლში ჯგუფებად დაყოფილები სხვა ბრალდებულებს აკავებდნენ, თავად ქეთევან ხმალაძეს ჩხრეკასთან დაკავშირებით უფლებებს აცნობდა: „ხმალაძის ნებართვით გავჩხრიკეთ მისი სახლი, მერე ანა სამსონიძე გამოვიძახეთ და ქეთევანი მან დააკავა“.

საწინააღმდეგოს აცხადებს ხმალაძე. მისი მტკიცებით იგი ჯერ დააკავეს, პოლიციის შენობაში გადაიყვანეს და სახლის ჩხრეკაზე იმ დღესვე, საღამოს წაიყვანეს: „რა დილის რვა საათზე ჩაატარეთ ჩხრეკა?! ეს აბსურდია! ამ აბსურდის თეატრს ვეღარ ვუყურებ. პროტესტის ნიშნად დარბაზს ვტოვებ!“

დარბაზშივე დააფიქსირა პროტესტი, თუმცა სხდომა არ დაუტოვებია ბრალდებულ დარიკო შ–ს. მისი გაღიზიანება სანდრო ცაბუტაშვილის ჩვენებას მოჰყვა. როგორც ბორჯომის რაიონული სამმართველოს თანამშრომელმა დარბაზში განაცხდა, მან მონაწილეობა თემურ ბ–ს დაკავებაში მიიღო.

„მაგას თემური კიარ დაუაკვებია მე დამაკავა. სახეზე „მასკაც“ არ ეკეთა და კარგად დამამახსოვრდა“, – განაცხადა დარიკო შ–მ.

ხმალაძის საქმეზე მომავალი სხდომა 11 აგვისტოს 12:00 საათზე გაიმართება.

შეგახსენებთ, რომ ნინოწმინდაში მომხდარი მკვლელობის საქმეზე ჯგუფურ ყაჩაღობაში ბრალდებით ქეთევან ხმალაძე ხუთ პირთან ერთად 16 იანვარს დააკავეს.18 იანვარს ერთ–ერთი დაკავებული გირაოს სანაცვლოდ გაათავისუფლეს.

[თამუნა უჩიძე, ახალციხე]