დღეს, 13 ივლისს, დაახლოებით სამი საათის განმავლობაში, სასამართლოს ჩვენებას პოლიციის ოთხი თანამშრომელი აძლევდა. ბორჯომის, ახალციხისა და ადიგენის რაიონული სამმართველოების უბნის ინსპექტორ–გამომძიებლებმა ბრალდებულების მიერ გამოძიებისთვის მიცემული ჩვენებები ადგილის მითითებებით გადაამოწმეს.
პირველი დარბაზში ბორჯომის რაიონული სამმართველოს უბნის ინსპექტორ–გამომძიებელი თეონა ივანიძე დაიკითხა. იგი საგამოძიებო ექსპერიმენტის ჩატარებისას თან ქეთევან ხმალაძეს ახლდა. ივანიძემ გამოიყვანა ხმალაძე ბორჯომის დროებითი მოთავსების იზოლატორიდანაც.
მოწმის განმარტებით, საგამოძიებო ექსპერიმენტის ჩატარება, სოფელ ტყემლანიდან, ქეთევან ხმალაძის სახლიდან დაიწყო: „ხმალაძის სახლში იკრიბებოდნენ და სუფრაზე დაგეგმეს მეორე დღეს წასვლა“.
ტყემლანიდან, ჩვენების მიხედვით, ბრალდებულები ნინოწმინდაში წავიდნენ.
„ნინოწმინდაში „ლიბერთი ბანკთან“ აკვირდებოდნენ ვალუტის დამხურდავებელს. ივანეს მანქანით იყვნენ. დაყაჩაღების მიზნით გაყვნენ. მანქანა მის სახლთან გააჩერეს“, – იხსენებს ივანიძე.
მისი თქმით, ბრალდებულები აკვირდებოდნენ თუ ვინ იყო სახლში: „ქეთევანი და კობა გადავიდნენ, რომ დაეკაკუნებინათ. ქეთევანმა დააკაკუნა, კარი მოხუცმა ქალმა გააღო. ხელი კრა კობამ ქალს და შიგნით შევარდა. ქეთევანი გამობრუნდა, მანქანაში დაჯდა და მძღოლმა გადააყენა მანქანა“.
როგორც მოწმემ დარბაზში განაცხადა, მას შემდეგ, რაც მანქანაში ყველა დაბრუნდა, მანქანა გორელოვკისკენ წავიდა: „თემური ყვიროდა ქალი მოვკალიო, მან დანა მიაწოდა მძღოლს და მძღოლმა დანა გადააგდო მარცხენა მხარეს. მერე მანქანა გააჩერეს, ტანსაცმელი გამოიცვალეს, გადაყარეს. ქეთევანი და თემური გადმოვიდნენ მერე მანქანიდან და ახალციხისკენ მიმავალ ტაქსს გაყვნენ. მანქანა იქ დარჩა. აქ დასრულდა ექსპერიმენტი“.
დაცვის მხარისა და თავად ხმალაძის შეკითხვები საგამოძიებო ექსპერიმენტის ჩატარებისას პოლიციელების მხრიდან ზეწოლას ეხებოდა. რაზეც მოწმემ განმარტა, რომ რაიმე მსგავსს ადგილი არ ჰქონია. თუმცა, როგორც ქეთევან ხმალაძის შეკითხვაში ჩანდა, მას საგამოძიებო ექსპერიმენტის ჩატარებისას ნინოწმინდის რაიონული სამმართველოს უფროსი სიტყვიერ შეურაცხყოფას აყენებდა.
თეონა ივანიძის შემდეგ ჩვენება ადიგენის რაიონული სამმართველოს უბნის–ინსპექტორ გამომძიებელმა გენადი კირვალიძემ მისცა. იგი ნოდარ ა–ს საგამოძიებო ექსპერიმენტს დაესწრო. მან, ისევე როგორც ივანიძემ, სოფელ ტყემლანიდან ნინოწმინდამდე ბრალდებულის ჩვენება ადგილების მითითებებით გაიხსენა. როგორც მისი ჩვენებით გაირკვა, ერთ–ერთმა ბრალდებულმა თემურმა მომხდარის შემდეგ ქურთუკი გაიხადა და ტყის პირას თოვლი მიაყარეს.
ტყემლანიდან ნინოწმინდამდე ადგილების მითითებით გაიხსენეს ბრალდებულ ივანე გ–ს ჩვენება ახალციხის რაიონული სამმართველოს თანამშრომლებმა თორნიკე კახიშვილმა და შალვა ოქრომელიძემ.
ასევე, ახალციხის რაიონული სამმართველოს თანამშრომელმა პაატა გელაშვილმა დღეს სასამართლოს ჩვენება ვერ მისცა. როგორც დარბაზში განმარტეს, იგი ბრალდებულის თბილისში, ციხეზე გადასაყვანად გამოიძახეს.
მომავალი სასამართლო პროცესი 19 ივლისს 14:00 საათზე გაიმართება.
შეგახსენებთ, ნინოწმინდაში მომხდარი მკვლელობის საქმეზე ჯგუფურ ყაჩაღობაში ბრალდებით ქეთევან ხმალაძე ხუთ პირთან ერთად 16 იანვარს დააკავეს.18 იანვარს ერთ–ერთი დაკავებული გირაოს სანაცვლოდ გაათავისუფლეს.
[თამუნა უჩიძე, ახალციხე]