დამალა თუ არა ექსპერტმა ქეთევან ხმალაძის დაზიანებები

დღეს, 9 აგვისტოს დაახლოებთ ორი საათის განმავლობაში აძლევდა სასამართლოს ჩვენებას სასამართლო–სამედიცინო ექსპერტი დავით მერაბიშვილი. იგი ნინოწმინდაში მომხდარი ყაჩაღობისა და მკვლელობის საქმეზე დაიკითხა.

მერაბიშვილმა ექსპერტიზა გარდაცვლილ სონიკ სააკიანს, მის რძალს ემა სააკიანს და ასევე მათ დაყაჩაღებაში ბრლადებულებს ჩაუტარა.

როგორც სასამართლო დარბაზში მერაბიშვილმა განმარტა, სონიკ სააკიანის გარდაცვალების მიზეზი მარცხენა საძილე არტერიის დაზიანება აღმოჩნდა: „ეს მსხვილი არტერიაა და სისხლდენით გარდაიცვალა. გარდა ამისა, მას 7 ჭრილობა ჰქონდა მიყენებულა მარცხენა მხარის არეში“.

რაც შეეხება ემა სააკიანს, მერაბიშვილის თქმით, მას ნაჭდევები ჰქონდა სხეულზე, ასევე ტკივილს უჩიოდა კისრის არეში: „ეს მსუბუქი დაზიანებები იყო ჯანმრთელობის მოუშლელად. შეშინებული იყო ძალიან“.

ექსპერტის განმარტებით ბრალდებულ ივანე გ–ს დაზიანებები არ აღენიშნებოდა. კობა შ–ს კი სახესა და სხეულზე სისხლნაჟღენთები ჰქონდა: „როგორც მან გამარტა, ეს დაზიანებები ტყემლანის ტყეში შეშის დამზადებისას მიიღო“.

„კობას ამდენი დაზიანება ზურგზე, ფეხზე, წელზე, სახეზე საიდან ჰქონდა, ხეს ხომარ აგორავებდნენ ზედ?“ – ჰკითხა ადვოკატმა ირაკლი ბარძიმაძემ მერაბიშვილს.

„მექანიზმის დადგენა ჩემი კომპეტენცია არ არის“, – უპასუხა ექსპერტმა.

„კობამ არ გითხრათ ხე დაეცა თუ პოლიციამ სცემა?“ – შეუბრუნეს მერაბიშვილს კითხვა ადვოკატებმა.

„ასეთი რამ არ უთქვამს“, – განაცხადა ექსპერტმა სხდომაზე.

დარბაზში ხმაური მერაბიშვილის დაკითხვისას იმ ნაწილს მოყვა, სადაც იგი ქეთევან ხმალაძის სხეულზე დაზიანებებს აღწერდა. ექსპერტის თქმით, ხმალაძეს ორივე ხელზე, იდაყვის არეში მომწვანო–მოლურჯო ფერის დაზიანებები აღენიშნებოდა: „ეს დაზიანებები ბლაგვი მკვრივი საგნით, დაახლოებით 13–15 იანვარს, ანუ დაკავებამდე სამი–ოთხი დღით ადრე ჰქონდა მიყენებული“.

ხმალაძის ადვოკატის კითხვაზე, რატომ არ დააფიქსირა მან ის, რომ ხმალაძეს თით ჰქონდა მოტეხილი, მერაბიშვილმა უპასუხა: „თითი რომ მოტეხილი ჰქონოდა და არ ეთქვა მტკივაო, წარმოუდგენელია. ასეთი რამ არ ყოფილა“.

ექსპერტის ამ განცხადებას თავად ხმალძემ უპასუხა: „თვალის ქუთუთოები რომ მქონდა ჩამობერილი ხომ გითხარი თავში ცემის შედეგია–მეთქი, ეს რატომ არ დააფიქსირეთ?! ისიც ხომ გითხარით, თითი მაქვს მოტეხილი–მეთქი, ესეც რატომ არ დააფიქსირეთ?!“

„არ გიჩვენებიათ! არ გითქვათქვამთ! ქუთუთოებიც არ გქონდა შეშუპებული, რომ გქონოდა დავწერდი“, – უპასუხა მერაბიშვილმა ბრალდებულს და სასამართლო–სამედიცინო ექსპერტიზის დასკვნაში იმ ნაწილის წაკითხვა მოითხოვა, სადაც ქეთევან ხმალაძის პირადი მონაცემები შეიტანა – ჩივილები არ აქვსო მიწერია და პირზე მადგებით თითქოს თითი მოტეხილი ჰქონდა“.

ამ განცხადებაზე ექსპერტს დარბაზში დაცვის მხარის წარმომადგენლებმა, საქმის ერთ–ერთ გამომძიებელთან, სამცხე–ჯავახეთის პოლიციის დეპარტამენტის თანამშრომელთან გიორგი ფარცახაშვილთან ნათესაური კავშირი შეახსენეს: „რა არის თქვენი გამომძიებელი ფარცახაშვილი?“

„ფარცახაშვილი ჩემი სიძის ძმაა“, – უპასუხა მერაბიშვილმა.

ამის შემდეგ დარბაზში ადვოკატების პროტესტი სასამართლო–სამედიცინო ექსპერტის მიერ ქეთევან ხმალაძის შემოწმების ადგილს მოჰყვა. როგორც დარბაზში მერაბიშვილმა განმარტა, მან ხმალაძე პოლიციის დეპარტამენტში შეამოწმა. თუმცა არა იზოლირებულ ადგილზე, არამედ იქ სადაც ხალხი და მათ შორის არა ერთი მამაკაცი მოძრაობდა.

მერაბიშვილის შემდეგ ჩვენება, დღეს სასამართლოს პოლიციის რვა თანამშრომლემა მისცა.

მომავალი სხდომა 11 აგვისტოს 12:00 საათზე გაიმართება.

შეგახსენებთ, ნინოწმინდაში მომხდარი მკვლელობის საქმეზე ჯგუფურ ყაჩაღობაში ბრალდებით ქეთევან ხმალაძე ხუთ პირთან ერთად 16 იანვარს დააკავეს.18 იანვარს ერთ–ერთი დაკავებული გირაოს სანაცვლოდ გაათავისუფლეს.

[თამუნა უჩიძე, ახალციხე]