დღეს, 17 აგვისტოს, ახალციხის რაიონულ სასამართლოში ნინოწმინდაში მომხდარი ყაჩაღობისა და მკვლელობის საქმეში ბრალდებულების დაკითხვა ხმაურის ფონზე მიმდინარეობდა. მოსამართლეს ადვოკატებისთვის შენიშვნისა და გაფრთხილების მიცემა, იმის შესახებ, რომ მოწმეს ხელს უშლიდნენ და კარნახობდნენ კიდეც, არა ერთხელ მოუხდა.
პირველი ჩვენება ჯგუფურ ყაჩაღობაში ბრალდებულმა კობა შ–მ მისცა. იგი წარდგენილ ბრალში თავს დამნაშავედ არ სცნობს. კობამ ჩვენების მიცემა იმ დილიდან დაიწყო, როცა იგი მეუღლესთან და ერთ–ერთ ბრლადებულთან დარიკო შ–სთან ერთად დააკავეს. თუმცა, მანამდე განმარტა, რომ იგივე საქმეში ბრალდებულ თემურ ბ–ს ციხიდან იცნობდა და ნინოწმინდაში გარკვეული დროის განმავლობაში მასთან ერთად ცხოვრობდა კიდეც.
როგორც კობა შ. ყვება, 16 იანვარს, გამთენიისას, ქეთევან ხმალაძის სახლში, იმ საძინებელ ოთახში, სადაც მეუღლესთან ერთად ეძინა, 15–მდე პოლიციელი შეიჭრა: „ძირზე დამაგდეს, ერთი მუცელზე მაჯდა, გაშლილ ხელებზე ფეხებით მადგნენ. მირტყამდნენ, თვალები უნდა დაგთხაროთო, ჩაცმაც კი არ მაცალეს“.
კობა შ–ს თქმით, მისთვის დაკავებისას არც უფლებები განუმარტავს ვინმეს და არც ის იცოდა, თავისუფლება რატომ აღუკვეთეს: „პოლიციაში რომ მიმიყვანეს,პირსაბანთან სისხლები ჩამომბანეს, მერე მითხრეს მუხლებზე დაიჩოქე, ფეხებზე გვაკოცეო. მაგას არ გავაკეთებდი. ამიტომ წყლის ბოთლი გამოიღეს და ის მირტყეს. ერთმა გააფრთხილა, თავით არ ურტყა, ბოთლი დაეტყობაო. მერე წიხლებიც მირტყეს“.
როგორც კობა შ. აცხადებს, მას ცემისას პოლიციის თანამშრომელბმა უთხრეს, რომ მიღებული დაზიანებები სამედიცინო ექსპერტთან ისე უნდა აეხსნა, თითქოს ტყეში ხის დამზადებისას მიიღო. მისივე თქმით, სამართალდამცავებმა ისე სცემეს, რომ დროებითი მთავსების იზოლატორი არ ღებულობდა: „ექიმებმა თქვეს, ასე ვერ მიგიღებთო და საავადმყოფოში წამიყვანეს, იქ ნემსი გამიკეთეს მხარში. მერე პოლიციამ მითხრა, აღარ თქვა, რომ ცუდად ხარ, ახალი წლის ღამეა, ჩვენც დასვენება გვინდაო და იზოლატორში მომათავსეს“.
ბრალდებულმა ამის შემდეგ ჩვენების მიცემა შეწყვიტა და განაცხადა, რომ აღარც პროკურორის და არც ადვოკატების შეკითხვებს უპასუხებდა. მიუხედავად იმისა, რომ იგი, როგორც მოწმე, ისე იკითხებოდა და მოსამართლის მხრიდან გაფრთხილებული იყო, რომ ყველა შეკითხვაზე პასუხი უნდა გაეცა.
კობა შ–სგან განსხვავებით, თითქმის ყველა შეკითხვას გასცა პასუხი მისმა მეუღლემ დარიკო შ–მ. მან ჩვენებაში დაადასტურა, რომ ყველა ბრალდებული ქეთევან ხმალაძის სახლში 16 იანვრამდე იყო შეკრებილი. მანაც ყურადღება პოლიციელების მხრიდან ცემასა და დამამცირებელ მოპყრობაზე გაამახვილა: „მე და ქეთინო ერთად გამოგვიყვანეს სახლიდან. პოლიციაშიც ერთად მიგვიყვანეს. იქ თავში მირტყამდნენ, ვინც მცემა, ამოცნობა შემიძლია, აქ იყო დაკითხვაზე, ვიტალი ჰქვია“.
დარიკო შ–სგან განსხვავებით, ყაჩაღობაში ბრალდებულებმა ქეთევან ხმალაძემ და ნოდარ ა–მ დუმილის უფლება გამოიყენეს. ამავე საქმეში მკვლელობაში ბრლადებულმა თემურ ბ–მ კი ჯერ განაცხადა, რომ ჩვენების მიცემა სურდა, შემდეგ კი გადაიფიქრა: „ამ ეტაპზე ჩვენებას არ მივცემ“.
მომავალ სხდომაზე, 24 აგვისტოს 13:00 საათზე, ექსპერტები დისტანციური წესით დაიკითხებიან.
შეგახსენებთ, რომ ნინოწმინდაში მომხდარი მკვლელობის საქმეზე ჯგუფურ ყაჩაღობაში ბრალდებით ქეთევან ხმალაძე ხუთ პირთან ერთად 16 იანვარს დააკავეს.18 იანვარს ერთ–ერთი დაკავებული გირაოს სანაცვლოდ გაათავისუფლეს.
[თამუნა უჩიძე, ახალციხე]