ბორჯომი სტიქიის შემდეგ – საგანგებო შტაბის სხდომა

საგანგებო შტაბის შეხვედრა ბორჯომის მუნიციპალიტეტის გამგეობაში დაახლოებით 10 წუთის წინ დაიწყო. შტაბს სამცხე–ჯავახეთის მხარის გუბერნატორი აკაკი მაჭუტაძე ხელმძღვანელობს.

ბორჯომის მუნიციპალიტეტის გამგეობის საზოგადოებასთან ურთიერთობის წარმომადგენელის ლონდა ფილიშვილის განმარტებით, სტიქიის შედეგად მიყენებული ზარალის სავარაუდო ოდენობაზე საუბარი ჯერ ნაადრევია.

მისივე თქმით, ქალაქს სამაშველო სამსახურის და დასუფთავების სამსახურის თანამშრომლები ასუფთავებენ და ცენტრალური პარკიდან ქარისაგან მოგლეჯილი ხეები გააქვთ.

„მიმდინარეობს ჩაწყვეტილი ელექტროსადენების აღდგენაც. თვითმართველობის თანამშრომლები შემთხვევის ადგილებზე არიან გასულები. პარკშია მძიმე მედგომარეობა“, – ამბობს ლონდა ფილიშვილი

შეგახსენებთ, გუშინ, 4 აგვისტოს, სტიქიამ ბორჯომს შეუტია. ძლიერი წვიმა და სეტყვა ბორჯომში საღამოს დაიწყო. წვიმისგან მოვარდნილი ნიაღვრებისგან დაიტბორა ქუჩები, შეფერხდა მოძრაობა, დაიტბორა პირველ სართულზე მდებარე კერძო ობიექტები და საცხოვრებელი სახლები. საჭირო გახდა 40–მდე ადამიანის ევაკუაცია. არიან მსუბუქად დაშავებულები. განსაკუთრებით მძიმე მდგომარეობა ბორჯომის იტორიულ პარკშია.

[თინათინ ზაზაძე, ბორჯომი]