ახალი მოადგილე ერთი წლის შემდეგ – სამცხე-ჯავახეთის გუბერნატორმა მოადგილე შეარჩია

მიქელაძის დანიშვნის შესახებ ბრძანება 1 აგვისტოს დაიწერა. გუბერნატორის მოადგილის რანგში მუშაობას კი, ადმინისტრაციის ყოფილი უფროსი, დღეიდან, 2 აგვისტოდან შეუდგა.

როგორც გიორგი მიქელაძე აცხადებს, იქიდან გამომდინარე, რომ გუბერნატორს ერთი მოადგილე ეყოლება, იგი ყველა კუთხით იმუშავებს: „ჯერ რომელიმე კონკრეტული მიმართულებით მუშაობაზე ჩამოყალიბებული არ ვარ, ყველა საქმეს შევითავსებ“.

მიქელაძე ამბობს, რომ გუბერნატორისგან შეთავაზება რამდენიმე დღის წინ მიიღო: „წლებია აქ, აპარატში ვმუშაობ და კარგად მიცნობს. ვფიქრობ არ გაუჭირდებოდა გუბერნატორს ჩემი მოადგილედ შერჩევა“.

გიროგი მიქელაძე სამცხე–ჯავახეთის სამხარეო ადმინისტრაციაში აპარატის უფროსად 2012 წლის მაისიდან მუშაობს. იქამდე ახალციხის გამგეობაში სხვადსხვა პოზიციები ეკავა.

სამცხე-ჯავახეთის გუბერნატორს მოადგილე გასული, 2015 წლის ივლისიდან აღარ ჰყავდა. შეგახსენებთ, ყოფილმა მოადგილემ ავთანდილ კაჭკაჭაშვილმა სამცხე–ჯავახეთის სახელმწიფო რწმუნებულის-გუბერნატორის მოადგილის პოზიცია 13 ივლისს, პირადი განცხადების საფუძველზე დატოვა.

კაჭკაჭაშვილი გუბერნატორის ერთადერთი მოადგილე იყო. მას ეს პოზიცია წელიწადნახევარი, 2014 წლის 3 იანვრიდან, 2015 წლის 13 ივლისამდე ეკავა. აკაკი მაჭუტაძეს, რომელიც გუბერნატორად 2013 წლის 13 დეკემბერს დაინიშნა, მეორე და მესამე მოადგილეები არ დაუნიშნავს და კაჭკაჭაშვილის წასვლის შემდეგ მოადგილე აღარ ჰყოლია.

[ლუბა გიორგაძე, ახალციხე]