სამცხე–ჯავახეთის გუბერნატორი მოადგილის წასვლაზე სიტყვაძუნწობს

„პირადი განცხადების საფუძველზე დატოვა თანამდებობა. რაც შეეხება მის მუშაობას, დადებითად ვაფასებ“,– განაცხადა გუბერნატორმა ჟურნალისტებთან ახალციხეში მიმდინარე ინფრასტრუქტურული პროექტების დათვალიერებისას.

შეგახსენებთ, რომ სამცხე–ჯავახეთში სახელმწიფო რწმუნებულის-გუბერნატორის მოადგილემ ავთანდილ კაჭკაჭაშვილმა თანამდებობა საკუთარი განცხადების საფუძველზე, გუშინ დატოვა. მისი წასვლის შესახებ ინფორმაცია „სამხრეთის კარიბჭემ“ დღეს დილით გაავრცელა. დილით აკაკი მაჭუტაძემ „სამხრეთის კარიბჭეს“ ჟურნალისტთან კაჭკაჭაშვილის მიერ თანამდებობის დატოვების შესახებ საუბარი არ ისურვა.

სამხარეო ადმინისტრაციის თანამშრომლებმა კი გვითხრეს, რომ კაჭკაჭაშვილის სამსახურიდან წასვლა მათთვის მოულოდნელი აღმოჩნდა.
ავთანდილ კაჭკაჭაშვილი 2014 წლის 3 იანვარს დაინიშნა. „სამხრეთის კარიბჭესთან“ მან განაცხადა, რომ მუშაობას სხვა საჯარო სამსახურში აპირებს, თუმცა, სად არ დააკონკრეტა.

ავთანდილ კაჭკაჭაშვილი გუბერნატორის ერთადერთი მოადგილე იყო. ამ დრომდე აკაკი მაჭუტაძეს, რომელიც გუბერნატორად 2013 წლის 13 დეკემბერს დაინიშნა, მეორე და მესამე მოადგილეები არ დაუნიშნავს.

[ვარლამ წიკლაური, ახალციხე]