სამცხე-ჯავახეთის ორი მოსწავლე ერევანში მიემგზავრება

პროექტი მესამე წელია ხორციელდება ფონდ „კონრად ადენაუერისა“ და თბილისის პოლიტიკური სკოლის მიერ. მასში სამხრეთ კავკასიის რეგიონის სამი ქვეყანა მონაწილეობს: საქართველო, სომხეთი და აზერბაიჯანი. თითოეული ქვეყნიდან 20 სკოლაა შერჩეული. სამცხე-ჯავახეთიდან პროექტში სამი სკოლაა ჩართული: ახალციხის პირველი და მესამე და ასპინძის პირველი საჯარო სკოლები.

ერევანში გასამგზავრებლად ახალციხის პირველი და მესამე საჯარო სკოლის მე-11 კლასის მოსწავლეები შეირჩნენ. ჟურნალისტის სტატუსით მიემგზავრება პირველი საჯარო სკოლის მოსწავლე მარი მიქელაძეც. ოცკაციანი დელეგაცია ერევანს, კერძოდ, კურორტ წახკაძორს ეწვევა.

”პროექტში არჩევნების გზით, ხმათა უმრავლესობით ამირჩიეს. 4 თებერვალს წახკაძორში მივდივარ. ძალიან გახარებული ვარ”, -ამბობს პროექტის ერთ-ერთი გამარჯვებული, პირველი სკოლის მოსწავლე თამარ ჯაფარიძე.

პროექტის მონაწილეები სომხეთში 5 დღეს დაჰყოფენ. სომხეთში აზერბაიჯანისა და სომხეთის სკოლის 20-20 მოსწავლეც მოიყრის თავს.
”ხუთი დღის განმავლობაში ბავშვები სხვადასხვა თემებს განიხილავენ, შეიქმნება ინტეგრირებული ჯგუფები, გაიმართება დისკუსიები”, - ამბობს პროექტის ტრენერი სამცხე-ჯავახეთში ნინო ნადირაძე.

დასასრულს, სომხეთში არჩევნების გზით 15 სკოლის მოსწავლე შეირჩევა, რომლებიც მარტში, 4 დღით, ბელგიაში, ბრიუსელში გაემგზავრებიან.

[ნინო ზედგინიძე, ახალციხე]