”მასწავლებლები სამოქალაქო განათლებისთვის”

აღნიშნული იდეა პედაგოგებს ერევანში შეხვედრისას გაუჩნდათ. პროექტის, ”დემოკრატია იწყება შენით” ფარგლებში, 17-20 იანვარს საქართველოს 20 მასწავლებელი ერევანს სტუმრობდა.

”ორი დღეა საქართველოში დავბრუნდი. ძალიან საინტერესო შეხვედრა იყო. ერთანეთს გავუზიარეთ ჩვენი პრაქტიკიდან მიღებული ცოდნა და დავგეგმეთ ინტეგრირებული გაკვეთილები”, - ამბობს პროექტის ტრენერი სამცხე-ჯავახეთში ნინო ნადირაძე.

პროექტი მესამე წელია ხორციელდება ფონდ ”კონრად ადენაუერისა” და თბილისის პოლიტიკური სკოლის მიერ. პროექტი სამხრეთ კავკასიის სამ ქვეყანას: საქართველოს, სომხეთსა და აზერბაიჯანს მოიცავს. თითოეული ქვეყნიდან 20 სკოლა და 10 მასწავლებელია შერჩეული. შარშან და შარშანწინ მასწავლებლები საქართველოში შეიკრიბნენ, წელს კი ქართველი მასწავლებლები ესტუმრნენ ერევანს, კერძოდ დილიჟანს.

ნინო ნადირაძის თქმით, შეხვედრაზე მასწავლებელთა ურთიერთობის სამი რგოლი განიხილეს: მასწავლებელთა ურთიერთობა სკოლებში, მათი ურთიერთობა ქვეყნის შიგნით და სამხრეთ კავკასიის ქვეყნებში.

”გაჩნდა იდეა შეიქმნას ასოციაცია ”მასწავლებლები სამოქალაქო განათლებისთვის”. ვფიქრობ, ეს ასოციცია იქნება ერთგვარი ხიდი მასწავლებლებსა და სამინისტროს შორის”, - განმარტავს ნადირაძე.

იდეის განხილვა უახლეს მომავალშია დაგეგმილი.

[ნინო ზედგინიძე, ახალციხე]