იუსტიციის მინისტრმა ქალაქ ვალეში მშენებარე საზოგადოებრივი ცენტრი მოინახულა

ვალეში საზოგადოებრივი ცენტრის მშენებლობა 14 მაისს დაიწყო და სექტემბერში უნდა დასრულდეს. სამუშაოებისთვის 445.000 ლარია გათვალისწინებული. საზოგადოებრივი ცენტრი ვალესა და მიმდებარე სოფლების მოსახლეობას მოემსახურება.

სამშენებლო კომპანიის დირექტორის თამაზ ზუხბაიას განმარტებით, ცენტრის მშენებლობა დათქმულ დროზე ადრე დასრულდება: "ხელშეკრულება 12 სექტემბრამდე გვაქვს გაფორმებული, თუმცა ვფირქობთ, რომ ადრე დავასრულებთ. ხელისშემშლელი პირობები არ გვაქვს. ამ ეტაპზე მოპირკეთება, კედლის გამაგრება, თაბაშირ– მუყაოს სამუშაოები მიმდინარეობს. მონტაჟდება ვენტილაცია ,ელექტროობა“.

ვალის საზოგადოებრივ ცენტრში ადგილობრივებს შესაძლებლობა ექნებათ 200 დასახელების მომსახურებით ისარგებლონ.

მინისტრის განმარტებით, ბოლო ოთხი წლის განმავლობაში საქართველოში 27 საზოგადოებრივი ცენტრი გაიხსნა.
„სოფლებში, 27 ადგილას, ჩვენს მოხუცებს, შუა ხნის ხალხს და რაც მთავარია, ახალგაზრდებს მივეცით საშუალება, რომ სოფლიდან გაუსვლელად 200–ზე მეტი საჯარო სერვისი მიიღონ, ჰქონდეთ უფასო კომპიუტერი, ინტერნეტი, წიგნი, მათ შორის ელექტრონული ბიბლიოთეკა“, – განაცხადა იუსტიციის მინისტრმა თეა წულუკიანმა.

თეა წულუკიანის განცხადებით, ქვეყნის მასშტაბით კიდევ 10 საზოგადოებრივი ცენტრის მშენებლობა მიმდინარეობს: „ჩვენ ოთხი წლის თავზე გვექნება ძალიან სერიოზული მასშტაბური ინფრასტრუქტურა მთელი საქართველოს მასშტაბით. ის პრიორიტეტი, რაც მე ყოველთვის მქონდა, რომ სერვისების ხელმისაწვდომობა არ უნდა იყოს დიდი ქალაქების ფუფუნება იუსტიციის სახლების სახით, ამის მერე შეიძლება ჩაითვალოს მიღწეულად“.

საზოგადოებრივი ცენტრების ინფრასტრუქტურის შექმნასა და პროგრამულ უზრუნველყოფას იუსტიციის სამინისტროს მმართველობის სფეროში მოქმედი სსიპ „სახელმწიფო სერვისების განვითარების სააგენტო“ უზრუნველყოფს. პროექტში ევროკავშირი და ადგილობრივი თვითმმართველობები არიან ჩართული.

[თინათინ ზაზაძე, ახალციხე]