ბარალეთში საზოგადოებრივი ცენტრი გაიხსნა

ბარალეთის საზოგადოებრივი ცენტრი ადგილობრივ მოსახლეობას საჯარო სერვისებთან ერთად, „მაგთისა“ და „ლიბერთი ბანკის“ მომსახურებასაც გაუწევს. ამავე დროს, ახალგაზრდებს საშუალება ექნებათ, უკაბელო ინტერნეტით უფასოდ ისარგებლონ. შენობაში განთავსებულია ბიბლიოთეკა,სწარფი გადახდის აპარატები, ასევე შეხვედრების და სკაიპის ოთახები.

საზოგადოებრივი ცენტრის მომსახურებით სოფელ ბარალეთის მოსახლეობასთან ერთად მიმდებარე სოფლების − კოთელიის, კოჭიოს, იხტილის, ბუღაშენის, ტურცხის, დიდი სამსარის, პატარა სამსარის, მერენიის, ლომატურცხის, ღადოლარის, ზაკვის, ბალხოს, გომანის, ალათუმნის, აგანის, ბეჟანოს, აზავრეთისა და ბურნაშენის − 20 ათასამდე მოსახლე ისარგებლებს.

ბარალეთის გარდა საქართველოში კიდევ 40 საზოგადოებრივი ცენტრია გახსნილი. საზოგადოებრივ ცენტრებში 200-მდე ადგილობრივი მოსახლეა დასაქმებული და ამ დრომდე ამავე სამსახურების მეშვეობით 250 000-მდე სერვისი გაიცა.

წლის ბოლომდე საქართველოს მასშტაბით კიდევ ორი საზოგადოებრივი ცენტრი გაიხსნება − ახალქალაქში, სოფელ კუმურდოსა და ცაგერში, სოფელ ლაჯანაში.

პროექტი ევროკავშირის ფინანსური მხარდაჭერით ხორციელდება.

[sknews.ge]