ვალეში საზოგადოებრივი ცენტრი გაიხსნა

ვალეში, რიგით 37-ე საზოგადოებრივი ცენტრი გაიხსნა, რომელიც ადგილობრივებს საჯარო სერვისებთან ერთად „მაგთისა“ და „ლიბერთი ბანკის“ მომსახურებასაც გაუწევს.

„ვალისა და მიმდებარე სოფლების მოსახლეობას დღეიდან შეეძლებათ, ის მომსახურება მიიღონ, რასაც დიდ ქალაქებში იღებს მოქალაქე“, - განაცხადა, საზოგადოებრივი ცენტრის გახსნის შემდეგ, იუსტიციის მინისტრმა თეა წულუკიანმა.

საზოგადოებრივ ცენტრში განთავსებულია საკონფერენციო დარბაზი, აქვე იმუშავებს უფასო ინტერნეტი, კომპიუტერები და ვიდეოკონფერენციის აპარატაურა. შენობაში ბიბლიოთეკაც განთავსდა.

გარდა ამისა ვალის ახალ საზოგადოებრივ ცენტრში გამგებლის რწმუნებულის აპარატიც იმუშავებს.

„საჯარო და სამოქალაქო კუთხით 300-მდე სერვისი გვექნება, რითაც ადგილობრივებს მოვემსახურებით და ამისათვის 6 თანამშრომელია დასაქმებული, რომლებიც ადგილობრივები არიან“-, გვითხრა ვალის საზოგადოებრივი ცენტრის მენეჯერმა გიორგი ასპანიძემ.

მისივე თქმით, ცენტრით ვალე და მიმდებარე სოფლები: სხვილისი, წყალთბილა, ნაოხრები, აბათხევი, წინუბანი, ჯულღა, დიდი პამაჯი, პატარა პამაჯი, ორალი, ყულალისი, საძელი და ხაკი ისარგებლებენ.

საზოგადოებრივი ცენტრის გახსნის მიზანს, იმ სოფლების სახელმწიფო და კერძო სერვისებით უზრუნველყოფას წარნოადგენს, რომელიც რაიონიდან მოშორებით მდებარეობას ან საზღვრის პირა სოფელია.

საქართველოს რეგიონებში აღნიშნული ცენტრების მშენებლობა ევროკავშირის ფინანსური მხარდაჭერით ხორციელდება.

ვალის საზოგადოებრივი ცენტრის მშენებლობაში 445.000 ლარი დაიხარჯა.









[ლუბა გიორგაძე, ახალციხე]