სოფელ გურკელში დათვმა ორი მამაკაცი დაგლიჯა

შემთხვევა დღეს, 28 ივლისს, საღამოს, სოფლიდან მოშორებით მოხდა. 62 წლის ალექსანდრე ჭ. –ს დათვი თივის მოგროვებისას დაესხა თავს. ამის შემდეგ კი, იგივე დათვმა, სარწყავ არხთან 50 წლის შოთა ყ. დაკბინა.

ორივე მათგანი სასწრაფო სამედიცინო სამსახურის თანამშრომლებმა საავადმყოფოში გადაიყვანეს. როგორც სასწრაფო დახმარების სამსახურში განგვიმარტეს, „ერთსაც და მეორესაც წინა მხრის ღია ჭრილობა აქვს. მათ სიცოცხლეს საფრთხე არ ემუქრება“.

აგარის ადმინისტრაციულ ერთეულში გამგებლის წარმომდგენლის გრიგოლ ღამბაშიძის თქმით, ადგილი სადაც შემთხვევა მოხდა, ტყესთან ახლოსაა: „ჯერ ალექსანდრე დაგლიჯა. იქიდან რომ გაიქცა, სარწყავი წყლის არხთან შოთა იყო და მერე იმას ეცა“.

როგორც ადგილობრივები ამბობენ, ერთი დაშავებული, ალექსანდრე, სოფელში თავისი ფეხით ჩავიდა. მეორე კი მისაშველებლად თანასოფლელებს ტელეფონით დაუკავშირდა.

„ყვიროდნენ გვიშველეთო. ყვირილზე ხალხიც მივიდა და სასწრაფოში დარეკეს“, – ამბობენ ადგილობრივები.

შემთხვევის ადგილზე ამ დრომდე იმყოფებიან ახალციხის რაიონული სამმართველოს თანამშრომლები.

„შედგა გასაუბრების ოქმი. მიმდიანრეობს წინა საგამოძიებო ღონისძიებები“, – აცხადებენ შსს–ში.

[თამუნა უჩიძე, თინათინ ზაზაძე, ახალციხე]