ახალქალაქში დათვმა 250–მდე სული ცხვარი დაგლიჯა

შემთხვევა დღეს, 14 აგვისტოს, გამთენიისას მოხდა. 1 600–სულიან ცხვრის ფარას დათვი თავს ისე დაესხა, რომ დაახლოებით 100 სული სულ გაანადგურა.

"მწყემსებს ძალიან შეეშინდათ, იმ წუთში ვერაფერი გააკეთეს, ჩემთან დარეკეს და აქედან მე ცხვრების იმ ნაწილის ჩამოსატანად, რომელიც დაშავებული იყო, მაგრამ ვეღარ გადარჩებოდა, მანქანები გავგზავნე", – ამბობს კოოპერატივ "ჭალას" გამგეობის თავმჯდომარის მოადგილე მამუკა ნასიძე.

კოოპერატივი 52 ფერმერს ეკუთვნის. მათი თქმით, დაახლოებით 100 000 ლარი იზარალეს.



"ყველა ე.წ. თოხლი, სანაშენო ცხვარი იყო, შვიდი–რვა თვიანი ბატკნები. ახლა მათ სანიტარული ნორმების დაცვით ვკლავთ, ეს არ არის მეორადი ხორცი და არ გვინდა რომ გავაფუჭოთ", – აცხადებს ნასიძე.

ახალციხის მუნიციპალიტეტის გამგებლის ზაზა მელიქიძის დახმარებით, "ჭალას" წარმომადგენლები დაკლულ ხორცს სხვადასხვა მეწარმეებთან მაცივრებში ათავსებენ.

"ვეცდებით რაც შეგვეძლება გვერდში დავუდგეთ", – ამბობს ახალციხის მუნიციპალიტეტის გამგეობის ეკონომიკური განვითარებისა და ქონების მართვის სამსახურის უფროსი ნოდარ ტალახაძე.

სოფლის მეურნეობის რეგიონული სამმართველოს მთავარი სპეციალისტი ალიკა კოსტანიშვილი კი აცხადებს, რომ სოფლის მეუნრეობის სამინისტროს მომხდარის შესახებ დღესვე შეატყობინებს: "კოოპერატივი სამინისტროშია რეგისტრირებული და მათ საქმიანობას კონტროლს უწევენ, ალბათ რაღაც დახმარებას აღმოუჩენენ".





[თამუნა უჩიძე, ვარლამ წიკლაური, ახალიცხე]