რეკრუტები ახალციხის მარათონზე

საწყისი საბრძოლო მომზადების ცენტრის ინიციატივით მოწყობილ ღონისძიებაში ცენტრის მეთაური, პოლკოვნიკი მამუკა ქავთარაძე, ინსტრუქტორები, ჯავშანსატანკო სასწავლო ცენტრის ოცეული, ასევე, ახალციხის სტუდენტების საექსპედიციო ჯგუფი, ახალციხის მძლეოსანთა კლუბის ახალგაზრდა სპორტსმენები, ახალციხის მერიის და მუნიციპალიტეტის წარმომადგენლები და სხვა ახალგაზრდები ჩაერთნენ.

„მსგავსი ღონისძიებები საწყისი საბრძოლო მომზადების ახალი ტრადიციაა, ყოველ სამ თვეში ერთხელ იმართება და მასში ყველა სამხედრო მოსამსახურე მონაწილეობს - მეთაურიდან რიგითამდე. სპორტული ღონისძიებები და შესაბამისი პროგრამები საწყისი საბრძოლო მომზადების ცენტრში ერთიანობის შენარჩუნებას უწყობს ხელს და ამაღლებს რეკრუტების მოტივაციას. ასევე მნიშვნელოვანი ფაქტორია შეიარაღებული ძალების პოპულარიზაცია, საზოგადოება მუდმივად უნდა გრძნობდეს, რომ ჯარი არის მისი ნაწილი“, - აცხადებს პოლკოვნიკი მამუკა ქავთარაძემ.

მარათონმა სტარტი ლეიტენანტ შოთა ხურციძის სახელობის ჯავშანსატანკო სასწავლო ცენტრიდან აიღო. მონაწილეებს 4.3 კილომეტრი უნდა გაერბინათ და ფინიშამდე, კვლავ ჯავშანსატანკო ცენტრამდე მისულიყვნენ.

სიმბოლური მარათონის მონაწილე რეკრუტები ფინიშამდე რაბათის ციხესიმაგრეში შეჩერდნენ და საქართველოს სახელმწიფო ჰიმნი შეასრულეს.

[sknews.ge]