ახალციხეში ჯავშანსატანკო სასწავლო ცენტრის კურსდამთავრებულებს დიპლომები გადასცეს

ახალციხის ციხის ტერიტორიაზე ჯავშანსატანკო სასწავლო ცენტრის კურსების დასრულების ცერემონიალი საქართველოს ჰიმნით გაიხსნა, რის შემდეგაც საქართველოს თავდაცვის მინისტრმა თინა ხიდაშელმა კურსდამთავრებულებს სწავლის წარმატებით დასრულება მიულოცა.

„ყოველი დღე, რომელიც კურსდამთავრებულებით ჯარის შემატებას ემსახურება არის უმნიშვნელოვანესი. მხოლოდ მაღალი ხარისხის განათლება და ქართველი ჯარისკაცების დიდი მოწადინება შესაძლებელს გახდის და ქვეყანას ჩვენს საბოლოო მიზნამდე მიიყვანს. მინდა მათ წარმატება ვუსურვო და ვუთხრა, რომ მალე მენახოს მათ ხელზე ნატოს სამკლაურები“, – განაცხადა თინა ხიდაშელი.

თავდაცვის მინისტრის მიმართვის შემდეგ ჯავშანსატანკო სასწავლო ცენტრის კურსდამთავრებულებს სწავლის დასრულება გენერალური შტაბის უფროსმა, გენერალ-მაიორმა ვახტანგ კაპანაძემ მიულოცა.

„მიხარია, რომ საქართველოს შეიარაღებული ძალები იღებენ ახალი გენერაციის ოფიცრებს, რაც ასე სჭირდება ჩვენს შეიარაღებულ ძალებს. დარწმუნებული ვარ, რომ ეს ის ხალხია, რომელიც წარმატებას მოუტანს მთელს საქართველოს", – ამბობს ვახტანგ კაპანაძე.

უმცროს ოფიცერთა, ტანკის მეთაურთა და მექანიზირებულ სპეციალისტთა კურსდამთავრებულებს დიპლომები თინა ხიდაშელმა და ვახტანგ კაპანაძემ გადასცეს. რის შემდეგაც დეკანოზმა მამა იოანემ კურსანტები დალოცა და მათ საჩუქრად ხატები გადასცა.

„დღევანდელი დღე განსაკუთრებით საამაყოა ჩვენთვის, რომ ასეთ საზეიმო ვითარებაში აღვნიშნავთ ჩვენს ცხოვრებაში ერთ – ერთ უმნიშვნელოვანეს მოვლენას, სატანკო ოფიცერთა მომზადების კურსის დასრულებას. მინდა კურსის სახელით ვთქვა, რომ ჩვენ საქართველოს შეიარაღებული ძალების ოფიცრებს კარგად გვქავს გათვითცნობიერებული ჩვენი როლი ქვეყნის წინაშე“, – ამბობს სატანკო ოფიცერთა მომზადების კურსდამთავრებული მამუკა მოსემღვდლიშვილი.

9 თვიანი მომზადების პროგრამა T-72, T-55 ტიპის ტანკების, ასევე ჯავშანტრანსპორტიორებისა და ქვეითთა საბრძოლო მანქანების БМП-1 და БМП-2 მართვას და ექსპლუატაციის შესწავლას გულისხმობდა. სამხედრო მოსამსახურეებმა საფუძვლიანი ტაქტიკური, ტექნიკური და საინჟინრო მომზადება გაიარეს.

საწვრთნელი პროგრამა ძირითადად საველე-პრაქტიკულ სწავლებებს მოიცავდა. კურსის გავლის შემდეგ, ოფიცრები საკუთარ ქვედანაყოფებს დაუბრუნდებიან და შესაბამის თანამდებობაზე გააგრძელებენ მსახურს.

ჯავშანსატანკო სასწავლო ცენტრის კურსების დასრულების ცერემონიალს მუსიკალურად ადგილობრივი ფოლკლორული ანსამბლი „მესხეთი“ აფორმებდა.


[მანანა სარაშვილი, ახალციხე]