ახალქალაქში საწყისი საბრძოლო მომზადების ცენტრს ზაზა ფერაძის სახელი მიენიჭა

ღონისძიების საზეიმო ცერემონიალი სასწავლო ცენტრის ახლად აშენებული შტაბის შენობის წინ გაიმართა.

„ვფიქრობ, ახალქალაქი ერთ-ერთი მნიშვნელოვანი გეოგრაფიული ადგილი უნდა იყოს საქართველოს შეიარაღებული ძალებისთვის. აქ სრულფასოვანი სასწავლო ცენტრის დაფუძნება, დამკვიდრება და საქმიანობის დაწყება ძალიან ბევრი მიზეზის გამო არის საინტერესო. ბევრი პროექტის განხორციელებას შეუწყობს ხელს და მნიშვნელოვან წვლილს შეიტანს ქვეყანაში მიმდინარე ინტეგრაციულ პროცესში. ცენტრის გახსნა მინდა მივულოცო ჩვენს შეიარაღებულ ძალებს, პირველ რიგში, განათლების სარდლობას. გაზაფხულზე ცენტრი სრულფასოვნად ამოქმედდება და ყველანი ერთად ჩამოვალთ კურსანტებთან შესახვედრად“, - განაცხადა თინათინ ხიდაშელმა.

ღონისძიებას შეიარაღებული ძალების გენერალური შტაბის უფროსი, გენერალ მაიორი ვახტანგ კაპანაძე, თავდაცვის მინისტრის მოადგილეები - დავით ებრალიძე და ანა დოლიძე, ახალქალაქისა და კუმურდოს ეპარქიის მღვდელმთავარი, მიტროპოლიტი ნიკოლოზი; სამცხე-ჯავახეთის გუბერნატორი აკაკი მაჭუტაძე, ახალქალაქისა საკრებულოს თავმჯდომარე ჰამლეტ მოვსესიანი, ნინოწმინდის გამგებელი გაგიკ კასრელიანი და ადგილობრივი თვითმმართველობის სხვა წარმომადგენლები დაესწრნენ. ღონისძიებაზე ასევე იმყოფებოდნენ სერჟანტ ზაზა ფერაძის ოჯახის წევრები.

საქართველოს თავდაცვის მინისტრსა და გენერალური შტაბის უფროსს საწყისი საბრძოლო მომზადების ცენტრის ხელმძღვანელობამ სასწავლო გეგმის შესახებ პრეზენტაცია წარუდგინა.

პრეზენტაციის დასრულების შემდეგ თავდაცვის მინისტრმა მშენებარე სასადილო დაათვალიერა და სამუშაოების მიმდინარეობას გაეცნო.
სასადილოს მშენებლობა მიმდინარე წლის ნოემბერში დასრულდება. სამომავლოდ დაგეგმილია ყაზარმისა და საკლასო ოთახების მოწყობაც. სამშენებლო სამუშაოებს „სამშენებლო კომპანია N1“ აწარმოებს.

შეგახსენებთ, რომ 10 აგვისტოს ახალციხეში ტანკისტის პროფესიული დღისადმი მიძღვნილი საზეიმო ღონისძიება ლეიტენანტ შოთა ხურციძის სახელობის ჯავშანსატანკო სასწავლო ცენტრში გაიმართა. თავდაცვის სამნისტროს წარმომადგენლები ახალქალაქში გამგზავრებამდე ახალციხეში იმყოფებოდნენ. საზეიმო ღონისძიებას უნდა დასწრებოდა თინათინ ხიდაშელიც, თუმცა არ დასწრებია. როგორც „სამხრეთის კარიბჭეს“ სამინისტროს პრესსამსახურის წარმომადგენელმა 10 აგვისტოს, დღის ბოლოს განუცხადა, თავდაცვის მინისტრი „ორფოლოს“ პოლიგონზე იმყოფებოდა და ამის შემდეგ პირდაპირ ახალქალაქში გაემგზავრა.

[sknews.ge]